Komandante PNTL Baucau, Superintendente Armando Monteiro. Imajen TATOLI/Natalino Belo

BAUCAU, 23 setembru 2021 (TATOLI)–Komandante Polísia Nasionál Timor-Leste (PNTL) Baucau, Superintendente Armando Monteiro, enkoraja joven atu kontinua kapasita-an, nune’e kontribui ba paz no estabilidade hodi partisipa iha prosesu dezenvolvementu.

“Juventude sira-nia papél iha pilár importante hanesan sai nu’udar autór mudansa, katak siénsia no treinamentu ne’ebé durante ne’e hetan, tenke responsabiliza no implementa iha moris rasik no sosiedade hodi kontribui ba dezenvolvementu rai ida-ne’e,” Superintendente Armando Monteiro hateten iha CDC, Triloka, kinta one’e.

Aleinde ne’e, konsidera mós katak joven nu’udar futuru nasaun, katak buka atu kontinua aprende atu aumenta kapasita-an nu’udar bukae iha futuru, tanba ne’e presiza iha solusaun ba Estadu nu’udar kontrolu sosiál.

“Presiza iha ideia konstrutivu no hatudu progresu serbisu, nune’e fó benefísiu ba an rasik no nasaun ein jerál,” nia akresenta.

Baucau nu’udar zona industriál ba dezenvolvementu, tanba ne’e Komandante PNTL munisipál ne’e husu atu joven atu kontribui ba paz no estabilidade iha rejionál ne’e.

PNTL rasik aleinde fó seguransa iha rai-laran, iha papél mós atu apoia implementa programa Governu, liuliu atu akomoda no enkoraja joven sira iha prosesu konstrusaun Estadu.

Komandu PNTL Baucau hahú halo konsolida ba joven, ne’ebé sei partisipa hosi veteranu no sosiedade sivil atu akompaña hodi buka solusaun ba situasaun ne’ebé levanta.

Liuhosi konsolidasaun ho joven sira iha postu neen, maioria hato’o preokupasaun haat hanesan sente abandonadu tanba laiha entidade ruma fó atensaun ba sira, diskriminadu, ofendidu no kriminalizadu.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here