Administradór Munisípiu Manufahi, Arantes Isaac Sarmento. Imajen/Egas Cristovão

DILI, 23 setembru 2021 (TATOLI)-Administradór Munisípiu Manufahi, Arantes Isaac Sarmento, informa Orsamentu Jerál Estadu (OJE) ba Munisípiu Manufahi totál $3,766,851 ne’ebé ezekusaun hahú hosi janeiru to’o mai 09 setembru ne’e atinje ona 60,14%.

“Ezekusaun ne’e ba kategoria hanesan saláriu vensimentu, bens servisu transferénsia públika, kapitál menór no kapitál dezenvolvimentu,” Arantes Isaac Sarmento ba Agência Tatoli liuhosi telefónika, kinta ne’e.

Nia hatutan, hosi ezekusaun OJE 2021 ba kategoria lima ne’e, progresu boot liu ne’e iha transferénsia públika tanba orsamentu hosi transferénsia públika ba merenda eskolár, subsídiu ba konsellu suku sira, no programa Mão de Obra ba Postu Administrativu sira.

Hosi ezekusaun OJE 2021, nia hatutan, 60,14% ba saláriu vensimentu ninia progresu sivilizasaun ho totál orsamentu hamutuk $655,216.27 ho ninia ezekusaun 55,56%, bens servisu nia totál progresu ezekusaun $9.852.50 persentajen 55,40, transferénsia públiku nia totál ezekusaun $757,887, persentajen 56,73, no kapitál menór totál progresu ezekusaun hamutuk $26,250 persentajen 34,31%.

“Orsamentu ba kapitál dezenvolvimentu komitmentu $161,834 ninia progresu ezekusaun persentajen sei mamuk, maibé ita iha ona kometimentu tanba halo ona dezeñu ho BQ, ba projetu haat hanesan konstrusaun ba sede Suku Babulo, konstrusaun Postu Administrativu Turiscai, Alas, no konstrusaun edifísiu STAE Manufahi ne’ebé mak sei iha hela re-verifikasaun tékniku hosi Ajénsia Dezenvolvimentu Nasionál (ADN),” nia dehan.

Totál ezekusaun hosi OJE 2021 ninia progresu daudaun ne’e hamutuk $2,313,955.77 ne’ebé ninia balansu sei hamutuk $ 1.718,748.69.

Nia hatutan, durante implementa OJE 2021 ba Q2 nian difikuldade ne’ebé sira hasoru mak atraza iha prosesu aprovizionamentu tanba dala barak servisu ho sistema, liña internet, no falta rekursu umanu iha área finansa no aprovizionamentu.

“Difikuldade sira hanesan menus rekursu umanu ne’e ita prepara ona iha OJE adisionál 2022, nune’e ba oin ita-nia planu prioridade ba kategoria lima ne’e ita foka liu ba kapitál dezenvolvimentu, bens servisu no kapitál menór tanba kapitál menór ne’e ami-nia prosesu tenderizasaun ba fasilidade ne’ebé atu apoiu ba administrasaun postu ninian agora daudaun prosesu aprovizionamentu la’o tiha ona tanba bainhira ami foku ba kategoria sira ne’e hanoin to’o dezembru nia rohan ami bele ezekuta OJE 2021 atinje 100%,” nia esplika.

Jornalista   : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here