Konselleru Másimu Partidu Kmanek Haburas Unidade Nasionál Timoroan (KHUNTO), José dos Santos Naimori Bucar. Imajen Tatoli/Eugénio Pereira.

DILI, 23 setembru 2021 (TATOLI)– Konselleiru Másimu Partidu KHUNTO, José dos Santos Naimori Bucar, hasoru malu ho Prezidente Parlamentu Nasionál, Deputadu Aniceto Longuinhos Guterres Lopes, nune’e partidu tolu bele hametin Plataforma Entendimentu iha diskusaun Orsamentu Jerál Estadu (OJE) 2022.

“Vizita ida-ne’e atu hametin liután Plataforma Entendimentu durante mandatu VIII Governu nian, hosi FRETILIN, PLP no KHUNTO, oinsá atu haree ba oin atubele haree ita-nia Orsamentu Jerál Estadu 2022 nian. Partidu tolu ne’e presiza hamutuk, koopera malu no kria liña koordenasaun atu nune’e buat hotu-hotu bele la’o ho di’ak, nune’e halo dezenvolvimentu di’ak ba ita-nia povu,” Naimori informa ba jornalista sira, hafoin hasoru malu ho PPN, iha uma fukun, kinta ne’e.

Konselleiru Másimu ne’e hateten, envelope fiskál 2022 hein de’it Konsellu Ministru halo aprovasaun no lakleur sei haruka ba Parlamentu Nasionál, entaun partidu tolu ne’e tenke kria ambiente ne’ebé di’ak hodi haree programa Governu nian karik mai iha Parlamentu Nasionál bele ultrapasa ho di’ak.

Naimori konsidera vizita ida-ne’e espesiál tebes, tanba atu hametin liután Plataforma Entendimentu hosi partidu tolu ne’e nian.

“Ne’e mak hotu-hotu nia hakarak, tanba nasaun ida tenke iha unidade ida, nune’e hodi haree ba futuru sai di’ak liután. La’ós idak-idak la’o ninian, maibé partidu tolu tenke hamutuk,” nia hateten.

Entretantu iha loron 16 setembru 2021, Komité Revizaun Orsamentu Polítiku (KROP), aprova ona tetu fiskál ba Orsamentu Jerál Estadu (OJE) tinan 2022 ho montante hamutuk biliaun $1,675.

Ho orsamentu 2022 ne’ebé lakleur Governu sei submete ba Parlamentu Nasionál, Naimori husu partidu FRETILIN, PLP no KHUNTO tenke unidade nune’e diskusaun orsamentu ne’e bele la’o ho ambiente saudável.

Plataforma Entendimentu ne’e forma hosi partidu Frente Revolusionária Timor-Leste Independente (FRETILIN), Partidu Libertasaun Populár (PLP) no Kmanek Haburas Unidade Nacional Timor Oan), iha Hotel Timor, Dili, iha 21 marsu tinan 2020 liubá, no plataforma ne’e kontinua metin to’o oras ne’e.

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here