Ministériu Saúde (MS) no Uniaun Europeia iha Timor-Leste (UE), hala’o diálogu kona-bá estartejia nutrisaun ba labarik iha TL, liu liu atu kontribui ba dezenvolvimentu sósio-ekonómiku nasaun nian. Imajen MS.

DILI, 23 setembru 2021 (TATOLI)—Ministériu Saúde (MS) no Uniaun Europeia iha Timor-Leste (UE), hala’o diálogu kona-bá estartejia nutrisaun ba labarik iha TL, liu liu atu kontribui ba dezenvolvimentu sósio-ekonómiku nasaun nian.

Iha ámbitu di’alogu ne’e parte rua konsidera labarik-sira ne’ebé ho kondisaun nutrisaun di’ak, sa’e ba adultu saudável sei kontribui ba dezenvolvimentu sósio-ekonómiku nasaun-nian.

Notísia relevante:MS-MAPKOMS inaugura izolamentu COVID-19 iha Aileu

“Nutrisaun importante ba labarik-sira ne’ebé iha direitu atu sobrevive, sai isin di’ak no forte,” Ministra Saúde, Odete Maria Freitas, hateten liu hosi komunikadu, kinta ne’e.

Diálogu kona-bá polítika nutrisaun ne’e, halibur Governu, Parlamentu, órgaun públiku hosi Ministériu Saúde, UNICEF, Uniaun Europeia, sosiedade sivíl, parseiru dezenvolvimentu sira no parte relevante sira.

Atu komplementa apoiu orsamentál, UE envolve UNICEF ho millaun EUR 4,8 (millaun $5,6), atu fornese apoiu tékniku ba Ministériu Saúde, no Ministériu sira seluk ne’ebé envolve, hodi hadi’a serbisu nutrisaun ne’ebé foka ba prevensaun no jestaun má nutrisaun no moras komún, diversifikasaun dieta no mudansa hahalok inklui prátika fó susubeen inan-nian.

Iha fatin hanesan, Embaixadór UE iha TL, Andrew Jacobs, hateten diálogu polítika fornese oportunidade ba diskusaun nakloke kona-bá estatutu, diresaun, no dezafiu-sira hosi reforma nutrisaun no jestaun Finansa Públika nian, kona-bá koordenasaun efetiva, entre parte oin-oin, no kona-bá progresu iha implementasaun apoiu ne’ebé fornese hosi UE no sira seluk, ho ninia aliñamentu ba estratejia no polítika Governu nian.

Diálogu ne’e realiza hosi parseria entre UE no TL, ne’ebé organiza hosi Serbisu Ordenadór Nasionál (SON) iha Ministériu Negósiu Estranjeiru no Kooperasaun (MNEK) nia okos, ho koordenasaun ho Delegasaun Uniaun Europeia nian iha TL iha Ministériu Saúde.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here