Reuniaun FFTL-LFTL ho Klube sira. Imajen Tatoli/Hortencio Sanchez

DILI, 23 setembru 2021 (TATOLI) –Reuniaun triparty entre Federasaun Futeból Timor-Leste (FFTL), Liga Futeból Timor-Leste (LFTL) no klube sira, iha salaun Xanana Sport Centre, Dili, kinta ne’e, hetan konsensu hodi realiza jogu iha tempu besik.

Antes ne’e parte tolu ladun iha komunikasaun di’ak ba malu hodi mosu polémika boot iha públiku no kansela Liga Futeból la hala’o to’o ohin loron. Maibé, iha ona solusaun no konkorda malu atu realize hikas liga époka 2021  ne’ebé tuir ajenda tentativa atu hala’o iha outubru, tinan ne’e.

Prezidente FFTL, Francisco Jerónimo hateten, reuniaun entre parte tolu iha rezultadu ne’ebé di’ak tanba parte hotu iha konkordánsia ba malu.

“Reuniaun ohin ne’e iha parte rua mak importante, primeiru mak liga konkorda ho saida mak FFTL deside, ikus mak klube sira konkorda ho desizaun saida mak FFTL foti,” Francisco ba Jornalista-sira hafoin reuniaun.

Nia esplika, subsídiu ba klube sira husi Primeira Divizaun no Segunda Divizaun $20,000.00 no $10,000.00. Maibé FFTL deside aumenta tan ho pakote ida hanaran fundu Covid-19 $5,000.00, ho nune’e klube Primeira Divizaun sei hetan $25,000.00 no Segunda Divizaun $15.000,00 durante jogu lao.

“Ida ne’e mak ikus mai klube sira hatán, klube sira ejije fali mai FFTL ba rekizitu sira todan uitoan bele diminui, ha’u foti kedan desizaun ba époka ida ne’e joga de’it sei tolera, maibé ba tinan oin tenke kompleta rekizitu sira ne’ebé mak nates ne’e FFTL hasai ona,” nia dehan.

Rekizitu ne’ebé mak klube sira tenke prienxe atu hetan subsídiu ba jogu sira mak hanesan, jogadór sira tenke klaru, medical jogadór nian tenke iha, klube sira nia edifísiu tenke klaru no seluk tan.

Iha fatin hanesan Prezidente LFTL, Nilton Telmo Gusmão afirma, enkontru ne’ebé halao parte tolu iha consensus ne’ebé di’ak hodi bele realize jogu iha tempu besik.

“Klube sira konkorda ona ho kondisaun hotu ne’ebé mak órgaun liga no FFTL propoin ba sira, komunikasaun ida ne’ebé mak di’ak tebes. Ha’u hanoin novidade di’ak liu mak futeból iha tempu badak halao fila fali,” nia dehan.

Époka ida ne’e sei foku de’it ba jogu ida mak liga ba Primeira Divizaun no Segunda Divizaun.

“Agora iha jogu mak liga de’it, kopa FFTL ita deside hamutuk ho FFTL para labele hala’o. Tasa 12 mak ha’u sei haree ko’alia fila fali internal ho órgaun liga no komité 12 de Novembru atu haree, maibé hanesan situasaun ekonomia iha ne’e difisil uitoan maibé mak ita haree,” nia afirma.

Iha reuniaun ne’e deside hamutuk fó loron 20 atu klube sira bele rejistu iha órgaun liga, atu nune’e,  bele hala’o jogu. Enkuantu ba kalendáriu jogu sei iha prosesu nia laran, maibé tuir informasaun jogu sei hala’o durante fulan rua hahú outubru termina iha dezembru 2021.

Iha sorin seluk,  jerente klube Portu Taibessi FC Charles, kontente tanba parte tolu iha ona hanoin hamutuk no parte rua FFTL-LFTL bele responde ona ejijénsia klube sira-nian liu-liu iha pandemia Covid-19.

Relasiona ho subsídiu jogu ne’ebé parte rua deside hodi aumenta sufisiente ona ba sira hodi realize jogu durante fulan rua.

Boavista marka mós prezensa  

Klube Primeira Divizaun Boavista FC Timor ne’ebé deklara ona ba públiku katak klube ne’e taka ona, maibé iha reuniaun entre parte tolu; FFTL, LFTL no klube ,  maibé  Jerente klube Boavista Ezy Leong  marka mós prezensa.

Prezidente LFTL Nilton Telmo Gusmão hateten, Boavista marka prezensa iha reuniaun no rona hotu kondisaun ne’ebé mak parte tolu diskute bazeia ba sira-nia lamentasaun ne’ebé antes ne’e sira fó sai.

“Ohin ita hotu haree ho matan rasik katak Boavista mai tuir reuniaun, ami esplika hotu sira-nia preokupasaun ne’ebé sira aprezenta, ami buka hotu atu akomoda, ami akomoda tuir ami nia kbiit, ami fó sai ona, husi klube 19 sira hotu konkorda maibé Boavista mai tan hamutuk klube 20 se nia atu mai fali rejistu partisipa jogu depende nia ami sei simu Nilton hateten.

 LFTL  iha esperansa Boavista sei partisipa iha liga époka ne’e no nia sei la taka nia klube.

“Ha’u espera Boavista hanesan ekipa ida ne’ebé sai kampiaun ona ba liga iha époka terseiru, nia sei partisipa nafatin atu ita nia atividade bele lao ba oin, animadu tebes hanesan uluk,” nia dehan.

Antes ne’e LFTL simu duni karta rezignasaun hosi Boavista maibé LFTL laiha despaixu ruma hodi konkorda Boavista nia rezignasaun ne’e, nune’e iha dalan atu Boavista bele ativu fila fali iha liga.

Jornalista   : Hrotencio Sanchez

Editór        : Francisco Simões

 

HAKEREK NO HATÁN

Please enter your comment!
Please enter your name here