Xefe Suku Labarai, Mouzinho Amaral. Imajen Tatoli/Celestina Teles

COVALIMA, 23 setembru 2021 (TATOLI)-  Governu seidauk konstrui uma  ba família 62 ne’ebé afetadu ba  Aeroporto Kay Rala Xanana Gusmão iha Aldeia Roek, Suku Labara, Postu Suai Vila, Munisípiu Covalima.

Ha’u nu’udar  autoridade hato’o komunidade nia ejijénsia ne’ebé mak hato’o mai ha’u, ne’ebé to’o ohin loron Governu seidauk konstrui uma ba família 62 afetadu ba aeroportu Kay Rala Xanana Gusmão,” Xefe Suku Labarai,  Mouzinho Amaral,  hato’o preokupasaun komunidade ne’e iha Suku Labarai, kinta ne’e.

Durante ne’e komunidade sira hato’o ona karta reklamasaun ba administrasaun munisípiu Covalima iha tinan 2020,  maibé tinan 2021 atu remata ona seidauk iha informasaun hosi Governu no Timor Gap hodi responsabiliza ba komunidade hirak-ne’e.

Iha Suku Matai Governu konstrui ona uma, maibé Suku Loho Rai to’o ohin loron seidauk halo konstrusaun uma ba komunidade afetadu ba família 62.

Ministru  Petróleu no Rekursu Minerais, Victor da Conceição Soares klarifika, tuir loloos dezenvolvimentu realokasaun ba  família 62  hala’o ona.

“Razaun saida mak seidauk hala’o iha ha’u nia mandatu, ha’u simu reklamasaun la’ós hosi komunidade Suku Labarai de’it, maibé simu mós reklamasaun mós hosi kompañia ne’ebé  envolve konkursu hodi  halo konstrusaun,” Ministru  Petróleu no Rekursu Minerais, Victor da Conceição Soares, hateten.

Aeroportu  Kay Rala Xanana Gusmão inaugura hosi Prezidente Repúblika (PR) Francisco Guterres Lú-Olo, iha loron 20 juñu 2017.

Aeroportu ne’e,  konstrui ho osan montante $67,691,189.85 husi kontraktor PT Waskita Karya, Persero, Tbk. ho durasaun servisu  loron 1.163 no hetan fiskalizasaun husi Konsultan Jurutera Perunding Zaaba.

Projetu ba konstrusaun aeroportu Suai ne’e hahú iha loron 30 fulan-Maiu 2014 no inaugura iha loron 20 juñu 2017. Aeroportu ne’e ho luan área 1220 metru kuadradu.

Jornalista       : Celestina Teles

Editór             : Francisco Simões

HAKEREK NO HATÁN

Please enter your comment!
Please enter your name here