Formandu 30 foto hamutuk ho Sekretáriu Estadu Formasaun Profesionál no Empregu, Alarico do Rosário no entidade relevante, hafoin simu sertifikadu, iha CDC, Baucau, kinta (23/09). Imajen TATOLI/Natalino Belo

BAUCAU, 23 setembru 2021 (TATOLI)—Sentru Dezenvolvimentu Komunitáriu (CDC, sigla portugés), iha kinta ne’e, atribui sertifikadu ba formadu na’in-30 ne’ebé hetan ona formasaun.

“Ami atribui sertifikadu ba formadu na’in-30, kompostu hosi mane na’in-16 no feto 14, ne’ebé aprende ona iha área ortikultura no agro-floresta durante fulan-neen, hahú janeiru to’o jullu 2021,” Diretór CDC, Vicente Matos Belo, hateten, liuhosi diskursu iha seremónia atribuisaun sertifikadu iha suku Triloka.

Biban ne’e, Diretór CDC husu ba graduante sira atu aplika iha Seasonal Worker Programme (SWP) and Pacific Labour Scheme (PLS) atubele asesu kampu traballu iha rai-laran no rai-li’ur.

“Ha’u husu mós atu formandu sira kontinua kapasita-an no aplika abilidade ne’ebé hetan ona atubele loke kampu traballu ba an rasik,” Diretór ne’e sujere.

Iha biban hanesan, Sekretáriu Estadu Formasaun Profesionál no Empregu (SEFOPE), Alarico do Rosário, husu ba formandu sira ne’ebé simu ona sertifikadu atu kontinua kapasita-an, nune’e bele kompete iha kampu traballu.

Tanba, Governu liuhosi SEFOPE hakarak fasilita formandu sira atu asesu ba kampu traballu tuir área espesialista no koñesimentu

“Ha’u husu imi kontinua hakbiit-an iha língua, tanba sai hanesan elementu importante atu kompete iha kampu traballu iha rai-laran no rai-li’ur,” Sekretáriu Estadu ne’e enkoraja.

Nune’e mós, Formandu área ortikultura, Isac Nuno Soares Ximenes, apresia no kontente, maski durante formasaun hasoru dezafiu balun iha matéria teoria no prátika, maibé konsege finaliza kursu.

Biban ne’e, Sekretáriu Estadu Alarico inaugura uma multi-funsaun ne’ebé suporta hosi SEFOPE no halo lansamentu formasaun ba dala-XII ne’ebé sei partisipa hosi formandu 43.

Seremónia ne’e partisipa hosi Diretora INDMO, Isabel de Lima, Komandante Polísia Nasionál Timor-Leste (PNTL) Baucau, Armando Monteiro, reprezentante Prezidente  Autoridade Munisípiu Baucau, Autoridade lokál inklui inan-aman hosi formandu-sira no konvidadu seluk.

Jornalista : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here