Komunidade Lourba postu administrativu Bobonaro, munisípiu Bobonaro, sosa hela bee moos. Imajen facebook.

BOBONARO, 23 setembru 2021 (TATOLI)—Fulan tolu ona mak abitante iha suku Lourba, postu admístrativu Bobonaro, munisípiu Bobonaro, sosa bee moos ba nesesidade loro-loron.

“Ami nia bee mak maran duni, iha tinan ida-ne’e, tanba volume bee hosi tanki distribuidór la sufiesiente ba  komunidade suku ne’e. Entaun, alternativa ma kami tenke hola atu bele sustenta nesesidade loro-loron,” Xefe Suku Lourba, Lino da Cruz, informa ba jornalista iha Maliana, kinta ne’e.

Notísia relevante:Serbisu Edukasaun Bobonaro prepara ba konstrusaun EBF Oplegul

Kanalizasaun bee moos ne’ebé oras-ne’e maran, mai hosi suku Tapo ne’ebé distribui ba populasaun hosi suku sia inklui suku Ole-eu, Malilait, Bobonaro, Marobo Komplex, no seluk tan, nune’e parte suku Lourba labele hetan.

Autotiridade lokál ne’e la fó kulpa ba Governu, tanba volume bee mak la sufisiente duni, no ba oin sei esforsu koordena ho autoridade munisipál atu buka solusaun oinsa maksimiza konservasaun bee iha bee matan, nune’e bainhira to’o bailoron bee labele maran.

Komunidade, Jacinta Pereira dos Reis, sente la augenta ona ho situasaun ne’e, tanba laiha kb’it atu sosa bee mos loro-loron.

“Emai mai faan bee masa 5 litru ne’e ho folin $0,50, tanki bo’ot ne’e faan ho folin $30. Sitausaun COVID-19 ami povu baibain laiha osan atu sosa,” nia espresa.

Dalaruma populasaun ba kuru iha mota la’o hosi aldeia Zobelis ba to’o Babalai ho ánsia kilómetru tolu, difikulta estudante sira atu hariis hodi ba eskola.

Suku Lourba iha aldeia haat mak hanesan Lourba Leten,  Zobelis, Gumer no Sordoli ho nia populasaun 1.984, ho totál uma-ka’in 432.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here