Organizasaun Raes Hadomi Timor Oan (RHTO) fó formasaun ba feto (ema) ho defisiénsia sira kona-bá lideransa. Imajen TATOLI/Nelia Fernandes.

DILI, 22 setembru 2021 (TATOLI)—Jestora Organizasaun Raes Hadomi Timor Oan (RHTO), Silvia A. Soares, hateten RHTO fó formasaun ba feto (ema) ho defisiénsia sira konabá lideransa no oinsá empodera feto maluk ho defisiénsia sira atu bele sai lideransa ne’ebé di’ak, no mós oinsá atu maneza sistema fund raising no peskiza.

“Konabá empoderamentu ekonomia feto, iha formasaun ne’e, ko’alia konabá oinsá mak empodera feto sira ho defisiénsia bele sai lideransa di’ak. Atu empodera feto tanba durante ne’e feto ho defisiénsia sira laiha oportunidade no laiha abilidade, entaun liuhosi formasauun ne’e ita komesa identifika ona, oinsa mak ita bele fó treinamentu no hasa’e sirania koñesimentu,” Silvia A. Soares hateten ba Agência Tatoli, iha Sentru Juvenil, Taibesi, Dili, kuarta ne’e.

Iha formasaun ne’e, partisipante balun mós lidera iha sirania organizasaun maibé durante ne’e sira seida’uk iha kapasidade, entaun ho formasaun ne’e bele hasa’e liután sirania koñesimentu ne’ebé mak iha.

Liuhosi formasaun ne’e, partisipante sira mós aprende konabá boa-governasaun ka lideransa nian tanba iha organizasaun ida tenke hatene oinsá mak sai lideransa ne’ebé mak di’ak.

“Sira mai ho organizasaun ne’ebé mak diferensa, entaun sira tenke aprende oinsá mak sai lideransa ne’ebé mak di’ak, tanba sai lideransa la’ós ema ida-ne’ebé mak sai boss maibé nia tenke sai hanesan ema-ne’ebé mak rona barak liu duké haruka,” nia dehan.

Bainhira sai lideransa la’os mai para atu manda de’it, maibé tenke rona mós bainhira ema ruma fó ideia tenke simu, tanba lideransa ne’e ema ida-ne’ebé mak tenke rona barak liu.

Nune’e mós RHTO fó formasaun ba boa-governasaun ka lideransa, RHTO fó mós formasaun konabá peskiza asaun partisipasaun (PAP), tanba iha organizasaun sira presiza hatene konabá peskiza nian.

“Liuhosi peskiza ne’e mak ita bele hatene atividade sira-ne’ebé mak durante ne’e ita halo, hanesan buat saida mak ita atinje ona, no buat saida mak ita seida’uk atinje,” nia akresenta.

Iha fatin hanesan, partisipante hosi Organizasaun ETBU, Manuel de Carvalho, hateten nia parte sente kontente tanba liuhosi formasaun ne’e bele aumenta nia koñesimentu.

“Iha formasaun ne’e, ami aprende fund rising ne’ebé ko’alia liu kona-bá negósiu, ne’ebé liuhosi formasaun ne’ebé iha ba future. Ha’u sei fahe tutan fali ba ha’u-nia maluk sira-ne’ebé la mai nomós ba komunidade ne’ebé iha negósiu, liu-liu ba feto ho defisiénsia iha TimorLeste,” nia dehan.

Partisipante ba formasaun ne’e hamutuk 30 kompostu hosi ema defisiénsia no ema lahó defisiénsia ne’ebé mai hosi DPOS, hanesan East Timor Blind Union (ETBU), Asosiasaun Halibur Defisiénsia Matan Timor-Leste (AHDMTL), Fundasaun AHISAUN, no Klibur Difisiente Tilun Timor-Leste (KDTTL).

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here