Vítima dezastre naturál hela iha tenda okos iha Sentru Evakuasaun Sede Suku Manleuana, Dili. Imajen Tatoli/Arminda Fonseca

DILI, 22 setembru 2021 (TATOLI)-Koordenadór vítima dezastre natural, 04 abríl 2021, iha Kampu Real Madrid Manleuana, Dili, José Abrão, informa loron-lima ona sira la asesu ba bee-moos.

“Difikuldade ne’ebé agora daudaun ami enfrenta mak bee-moos tanba loron-lima ona kompañia ne’ebé loroloron lori bee-moos mai la mai ona enxe bee ba tanke lima ne’ebé monta iha ne’e,” José Abrão hateten ba Agência Tatoli iha sede Suku Manleuana, kuarta ne’e.

Nia hatutan, durante loron-lima bee-moos laiha refujiadu sira husu bee-moos ba komunidade ne’ebé hela besik sira lae sira buka bee-moos ne’ebé iha hodi kuru.

“Fatin ne’ebé ami hela de’it difikuldade boot ona ba ami agora bee-moos laiha tan ida ne’e halo ami arraska loos, tanba ha’u ba Governu ajuda lalais bee-moos ba ami,” nia dehan.

Difikuldade sira ne’e nia parte hato’o ona ba lideransa komunitáriu no lideransa komunitáriu rasik mós hato’o ona ba parte relevante maibé to’o agora la lori nafatin bee-moos mai.

Xefe Aldea Lemo-Kari, Suku Manleuana, Postu Administrativu Dom Aleixo, Munisípiu Dili, Estaqui Tilman, afirma nia parte hato’o preokupasaun ne’e ba parte Munisípiu Dili maibé seidauk iha resposta.

Hatán ba preokupasaun ne’e, Adjuntu Prezidente Autoridade Munisípiu Dili, António Moniz Clau hateten, nia parte ohin foin rona tanba ne’e nia parte sei haruka bee-moos ba komunidade refere.

Totál vítima dezastre natural ne’ebé daudaun ne’e sei kontinua okupa hela iha Kampu Real Madrid Manleuana Dili hamutuk uma-kain 41.

Jornalista   : Arminda Fonseca

Editór        : Francisco Simões

HAKEREK NO HATÁN

Please enter your comment!
Please enter your name here