Prezidente Komisaun G, António Verdial. Imajen TATOLI/Natalino Belo

BAUCAU, 22 setembru 2021 (TATOLI)–Deputadu komisaun G ne’ebé trata asuntu Edukasaun, Kultura, Juventude, Desportu no Sidadania, hala’o fiskalizasaun servisu iha Administrasaun Baucau.

Prezidente Komisaun G, António Verdial, hateten, setór edukasaun hanesan problema pertenente ne’ebé presiza tebes órgaun ezekutivu trata no reprezentante povu nu’udar orgaun fiskalizadór tenke iha prezensa direta iha terrenu hodi haree, rona no observa direta ba situasaun reál edukasaun iha Timor-Leste.

“Kestaun edukasaun iha territóriu importante liu mak infraestrutura no rekursu umanu, ida-ne’e presiza tebes Governu sentrál tau matan, atu nune’e bele lori edukasaun ba dalan nabilan iha futuru,” Prezidente Komisaun G, hateten iha sala VIP, Administrasaun munisipál, Villa nova kuarta ne’e.

Deputadu refere ba eskola online, ne’ebé kondisaun ekonomia uma-laran povu nia sai difikuldade boot atu implementa.

“Kuandu ita hakarak realiza ensinu aprendizajen via online, klaru ita presiza telemóvel Android, no pulsa, ne’ebé fasilidade sira ne’e sei menus tebes tanba ne’e mak difikulta ita realiza eskola online iha territóriu nasionál tomak,” nia akresenta.

Enkuantu infraestrutura iha tinan fiskál 2021 ne’e, PN aprova osan ba Governu liuhosi MEJD atu harii Eskola iha territóriu tomak hanesan atu hadi’a sala aula eskolar, sintina no konstrusaun eskola foun inklui reabilitasaun.

Iha fatin hanesan, Prezidente Admistrasaun Munisipál (PAM) Baucau, Olívio ‘Bou-Lesa’ Freitas, apresia ho prezensa komisaun.

“Ohin relata situasaun balun ba Komisaun G atubele levanta iha plenária, diskute, no buka solusaun adekuada relasiona ho prekupasaun sira iha munisípiu Baucau,” PAM Baucau akresenta.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here