Pesoál saúde prepara vasina Sinovac atu oferese ba abitante iha Sentru Saúde Comoro, segunda (13/09). Imajen TATOLI/António Gonçalves

DILI, 22 setembru 2021 (TATOLI)–Governu liuhosi reuniaun Konsellu Ministru (KM) diskute kona-ba prosesu implementasaun no funsionamentu sertifikadu vasinasaun kontra COVID-19 eletrónika.

Mekanizmu ne’e aprezenta hosi Komisaun interministeriál ba elaborasaun no koordenasaun ezekusaun planu vasinasaun kontra COVID-19, ne’ebé lidera hosi Vise Primeiru-Ministru no Ministra Solidariedade Sosiál no Inkluzaun, Armanda Berta dos Santos, hamutuk ho Ministra Saúde, Odete Maria Freitas Belo, inklui ekipa.

“Governu kria plataforma eletrónika ne’ebé mak bele fiar, di’ak no seguru atubele ajuda ita bainhira simu ona vasina, bele hafasil ita hodi bele komprova, tanba ho mekanizmu atuál (surat tahan) la seguru, karik mosu ahi han uma, inundasaun ka kartaun lakon, maibé ho eletróniku ne’e, kualker fatin bele konfirma inklui viajen internasionál bele konfirma katak ema ne’e vasina ona iha Timor-Leste,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu iha Palásiu Governu, kuarta ne’e.

Sistema ne’e lansa ona iha loron 10 juñu liubá, ne’ebé funsiona liuhosi aplikasaun ba telemóvel RSETL hosi Programa Saúde Família no iha biban hanesan lansa mós ho vasina doze daruak.

Plataforma ne’e kontein rejistu vasinasaun no funsiona mós hanesan komprovativu ba viajen hosi munisípiu sira ne’ebé tama períodu serka sanitária ba munisípiu seluk.

 Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here