iklan

NASIONÁL, HEADLINE, KAPITÁL

Governu bandu lori mate-isin vizita instituisaun direta-indireta Estadu

Governu bandu lori mate-isin vizita instituisaun direta-indireta Estadu

Primeiru Ministru, Taur Matan Ruak, prezide reuniaun Konsellu Ministru, Iha Palásiu Governu, segunda (22/09). Imajen TATOLI/Francisco Sony

DILI, 22 setembru 2021 (TATOLI)–Governu liuhosi reuniaun Konsellu Ministru (KM) aprova Projetu Rezolusaun Governu, ne’ebé bandu funsionáriu lori mate-isin vizita edifísiu instituisaun direta-indireta Estadu ka organizasaun realiza seremónia fúnebre iha edifísiu, ne’ebé iha memória funsionáriu, ajente ka traballadór administrasaun públika.

“Rezolusaun Governu ne’e halo provisaun ida ba administrasaun direta no indereta Estadu sira hotu atu labele lori dezrespeita funsionáriu sira ne’ebé mate, atu ba vizita instalasaun ka edifísiu sira, ne’ebé bainhira funsionáriu ruma mate, ita maka ba mate uma la’ós lori fali mate ba fatin servisu ka lori ba fatin-fatin,” Ministru Prezidénsia Konsellu Ministru, Fidelis Manuel Leite Magalhães, relata, hafoin reuniaun ezekutivu iha Palásiu Governu, kuarta ne’e.

Tuir Ministru, kestaun ne’e sai preokupasaun Governu iha kontestu pandemia .

“Ida-ne’e mós sai preokupasaun ida tanba iha prátika ne’ebé ladún di’ak ba saúde públika,” nia akresenta.

Kona-ba kazu esesionál ne’ebé mak envolve titulár órgaun soberania sira, iha tempu oin mai Governu sei kria lejizlasaun no regulamentu ruma.

“Bainhira iha Lei Protokolu Estadu, sei regula kona-ba ida-ne’e, tanba iha lei mak sei determina sé de’it mak bainhira mate karik ita bele vizita fatin públiku sira atu sidadaun sira bele vizita ka partisipa,” nia hatutan.

Jornalista : Antónia Gusmão

Editora     : Julia Chatarina

iklan
iklan

Leave a Reply

iklan
error: Content is protected !!