Prezidente FFTL, Francisco Martins da Costa Pereira Jerónimo. Imajen TATOLI/Francisco Sony

DILI, 22 setembru 2021 (TATOLI) – Prezidente Federasaun Futeból Timor – Leste (FFTL), Francisco Jerónimo hateten, komunikasaun  F-FTL ho Liga Futeból Timor-Leste di’ak ona, nune’e aban loraik sei realize enkontru entre FFTL, LFTL no klube sira.

Notísia Relevante : Komunikasaun FFTL ho LFTL ladún armonia

“Kinta aban, ajenda loos ona, ha’u rasik ho Prezidente LFTL no klube sira hasoru malu hodi ko’alia kona-ba prosesu liga ne’e rasik atu hahú ho orsamentu no buat sira ne’e hotu, entaun konvite ba klube sira ami na’in rua asina hotu. Ami komunika ba malu di’ak hela, ami na’in rua Prezidente Nilton hasoru malu ho Sekretáriu Estadu Juventude no Desportu, ami ko’alia iha ona konkluzaun,” Francisco Jerónimo ba Agência Tatoli iha edifísiu FFTL, Dili, kuarta ne’e.

Nia dehan, objetivu reuniaun ho klube sira atu husu klube sira prepara an atu partisipa jogu, Liga, kopa FFTL no tasa 12 de Novembru.

“Ami tenke iha akordu entre parte rua; FFTL-LFTL kona-ba ezekusaun orsamentu ne’ebé mak Governu haruka mai, FFTL sei enkontru ho klube sira atu esklarese saida mak akontese, ikus liu orsamentu sira bazeia ba planu no programa ne’ebé mak halo ona,” nia dehan.

Jornalista   : Hrotencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here