Estudante sira partisipa iha aprendizajen. Imajen Tatoli/Egas Cristóvão

DILI, 22 setembru 2021 (TATOLI) – Eskola ensinu báziku, ensinu sekundáriu jerál Herois da Patria no eskola ensinu báziku centrál (EBC) Bidau Akadiruihun, hetan autorizasaun bele hahú ona aula prejensiál, maibe atividade eskola rua ne’e seidauk másimu tanba estudante no profesores sira barak seidauk hetan informasaun no balun sei iha munisípiu.

Ministru Edukasaun Juventude no Desportu (MEJD), Armindo Maia, autoriza ona eskola 99 iha Dili bele hahú ona atividade aula prejensiál ba estudante sira tanba prienxe ona rekizitu vasinasaun 90%. Maibé  eskola ensinu báziku no ensinu sekundáriu jerál Herois da Patria, Becora, no eskola ensinu báziku centrál (EBC) Bidau Akadarihun ninia atividade seidauk lao ho di’ak maske hetan ona automizasaun.

Diretór eskola ensinu báziku no ensinu sekundáriu jerál Herois da Patria, José Diaz Guterres informa eskola Herois da Patria prienxe ona rekizitu ministériu saúde no organizasaun mundiál saúde  nian, maibé atividade eskola maka seidauk lao másimu

“Difikuldade maka partisipasaun estudante no profesores sira nia seidauk másimu tanba barak seidauk hetan informasaun inklui balun sei iha munisípiu,” Diretór José Diaz Guterres hateten jornalista sira iha eskola Herois da Patria Becora, Dili, kuarta ne’e.

Nia esplika depois sira simu sirkulár hosi MEJD bele hahú ona aula prejensiál, parte eskola fó sai kedan anunsia ba estudante sira liuhosi grupu WhatsApp, maibé estudante 300 nia partisipasaun maka seidauk másimu.

Fundadór eskola ne’e afirma hosi eskola 99 ne’ebé MEJD autoriza ne’e Eskola Herois da Patria  tama kategoria númeru 30. Tanba profesores 17 frekuente iha eskola ne’e vasina hotu ona.

Eskola Ensinu Báziku Centrál (EBC) Bidau Akadiruhun mós hetan oan automizasaun bele hahú ona aula prejensiál, maibe atividade ensinu aprendizajen seidauk másimu tanba estudante 1,530 iha eskola ne’e barak seidauk hatán informasaun.

Adjuntu EBC Bidau Akadiruhun, Ilda Belo reforsa maske atividade iha eskola ne’e seidauk másimu maibé movimentu atividade aprendizajen hahú ona, tanba profesores 46 iha eskola ne’e simu hotu ona vasinasaun 90%.

Jornalista : Tomé Amado

Editór        : Francisco Simões

HAKEREK NO HATÁN

Please enter your comment!
Please enter your name here