Sekretáriu Rejionál Asuntu Agrikultura, Jose Eta. Imajen TATOLI/Abílio Elo Nini.

OÉ-CUSSE, 22 setembru 2021 (TATOLI)—Autoridade Rejiaun Administrativa Espesiál Ambeno Oe-cusse (RAEOA) simu proposta hosi komunidade suku Suni-Ufe, sub-rejiaun Nitibe no suku Abani, sub-rejiaun Pante Makasar, liuhosi programa Food for Work hodi fó apoiu fahe hahán ba komunidade halo lutu hale’u to’os kuda modo no pateka nian hodi dezenvolve ortikultura.

“Dirasaun agrikultura simu ona proposta hosi xefe suku sira no jestór sira, husu apoiu téknika no materiál atu dezenvolve ortikultura”, Sekretáriu Rejionál Asuntu Agrikultura, José Eta, ba Agência Tatoli iha Oé-Cusse, kinta.

Nia dehan Suku Suni-Ufe sira-nia área ektare-rua, tanba ema barak koñese área pateka entaun komunidade hakarak dezenvolve-liután liuhosi programa food for work.

Suku ne’e, nia hatutan komunidade hamutuk uma kain 150 hahú ona prepara to’os permanente no suku Lela-Ufe mós submete ona proposta, entaun autoridade sei oferese foos atu fasilita sira, nune’e bele halo lutu ba to’os permanente ba produsaun ortikultura.

Proposta seluk hosi suku Abani, sub-rejiaun Pasabe, submete ona ba Dirasaun Agrikultura no Prezidente Autoridade hodi hetan aprovasaun.

“Iha proposta sira-ne’e foku liu ba ortikultura pateka. Hanesan iha suku Suni-Ufe, loro-loron ema barak vizita atu sosa pateka, entaun nia rendimentu di’ak. Suku balun hakarak harii grupu ho proposta fasilita téknika ba sira,” nia dehan.

Atu garante ba akompañamentu téknika, daudaun ne’e Sekretáriu Agrikultura destaka ona extensionista sira iha suku 18 atu servisu hamutuk ho komunidade iha baze hodi dezenvolve servisu agrikultura iha nivél suku no aldeia.

Xefe suku Lela-Ufe, José Neno sila, hateten importante tebes apoiu hosi autoridade ba komunidade atu kuda sira-nia produtu, tanba programa Food for Work parte ida konserva bee-matan sira bele aproveita dezenvolve mós área agrikultura.

“Ami nia proposta hatama ona, tanba iha ami-nia suku bee-matan barak mak involve iha programa food for work hodi konserva bee-matan. Entaun, aproveita komunidade sira halo agrupamentu bele halo to’os hodi uza ba ortikultura kuda moda no ai-fuan sira seluk hanesan pateka, tanba autoridade sei fasilita téknika oinsá dezenvolve produtu sira-ne’e,” nia dehan.

Jornalista : Abílio Elo Nini

Editór      : Cancio Ximenes

HAKEREK NO HATÁN

Please enter your comment!
Please enter your name here