Asisténsia Legál ba Feto no Labarik (ALFeLa), hala’o formasaun ba Ofisiál Polísia Suku (OPS), iha munisípiu Viqueque, kona-bá atendimentu ka asisténsia ba violénsia bazeia ba feto no labarik, kuarta (22/09/21). Imajen Tatoli/Vitorino Lopes da Costa.

VIQUEQUE, 22 setembru 2021 (TATOLI)—Organizasaun Asisténsia Legál ba Feto no Labarik (ALFeLa) hala’o formasaun ba Ofisiál Polísia Suku (OPS), iha munisípiu Viqueque, kona-bá atendimentu ka asisténsia ba violénsia bazeia ba feto no labarik.

Objetivu hosi kapasitasaun ne’e, atu hasa’e koñesimentu ba membru polísia liuliu OPS, hodi halo asisténsia ba krime bazeia ba jéneru hosi komunidade munisípiu Viqueque.

Notísia relevante:ALFELA Rejista Kazu Violasaun 452 Hasoru Feto ho Labarik

“Ita introdús matéria krime públiku, semi públiku, krime violénsia doméstika no krime seksuál,” Advogada ALFeLa, Elvira Maria da Costa, hateten ba jornalista iha salaun Komandu PNTL Viqueque, kuarta ne’e.

Hosi formasaun ne’e bele aumenta membru OPS-sira nia koñesimentu, hodi halo asisténsia ba vítima feto no labarik iha prosesu sira justisa formál.

Iha fatin hanesan, Komadante PNTL Munisípiu Viqueque, Superintendente, Sebastião Alves Quitão, sente kontente tanba bele hetan matéria lubuk ida hosi ALFeLa, no sei aplika saida mak apreende iha fromasaun ne’e.

Nia konsidera kapasitasaun ne’e importante tanba polísia mak lorloron hamutuk ho komunidade no dala barak sempre enfrenta problema, nune’e hosi formasaun ne’e bele ajuda liu tán oinsa fó asisténsia ne’ebé di’ak.

Formasaun ne’ebé hala’o durante loron rua,  hetan partisipasaun hosi membru OPS na’in 36 hosi suku 36, iha munisípiu Viqueque.

Formasaun ne’e realiza tanba hetan fundus hosi Uniaun Europeia (UE), liu hosi programa inisiativa Spotlight.

Jornalista: Vitorino Lopes da Costa

Editór: Cipriano Colo

HAKEREK NO HATÁN

Please enter your comment!
Please enter your name here