Transporte para iha Estasionamentu iha área Banco Nasionál Ultramarinho (BNU) nia oin. Imajen Tatoli/Dok

DILI, 22 setembru 2021 (TATOLI)-Sekretariadu Prezidente Autoridade Munisípiu Dili, António Moniz Clau informa, durante  agostu, tinan ne’e, Munisípiu Dili rekolla  osan  $3,811,50 hosi taxa atividade estasionamentu transporte karreta ho motór.

“Kona-ba taxa hosi fatin estasionamentu sira iha Dili, ba fulan agostu, tinan ne’e, ita rekolla osan hamutuk $3,811,50 maibé ita konta hosi janeiru to’o agostu ne’e, entaun ita rekolla osan hamutuk $18,258,10,” Antonio Moniz Clau hateten ba Agência Tatoli iha nia knaar fatin Mataduro, Dili, kuarta ne’e.

Munisípiu Dili fatin estasionamentu iha hitu, maibé hosi hitu ne’e lima mak monta ona pesoál kobertura hanesan, Merkadu Taibesi, Avenida Liberdade  Imprensa, Avenida 20 de maiu, Avenida Martires da Patria, rua 25 de abríl no rua ne’ebé seidauk monta ema halo kobertura mak hanesan Kuluhun no parte Vila-Verde Katedrál nian.

“Razaun tanba ita-nia ema mak la to’o, maibé ita iha ona planu ba 2022 sei halo rekrutamentu ba pesoál estasionamentu sira, nune’e bele halo kobertura ba fatin estasionamentu sira,” nia dehan.

Funsionáriu totál ba fatin estasionamentu lima iha Munisípiu Dili  hamutuk 56, maibé situasaun balu ne’ebé funsionáriu sira enfrenta terrenu mak movimentu barak funsionáriu sira labele kobre hotu.

Zona estasionamentu sira ne’e estabelese bazeia ba diploma ministeriál konjunta númeru 48/2017 no númeru 16/2018 ne’ebé mak aprova kriasaun zona estasionamentu durasaun limitada iha Munisípiu Dili.

Kona-ba a billete sira ne’ebé  koloka ba karreta no motór ne’e, hahú hosi $0,10 to’o $0,75.  Tuir tipu transporte Mikrolete inklui karreta ki’ik sira oras ida selu $0,25, kamioneta oras ida $0,50 karreta boot hanesan tronton oras ida $0,75, no motorizada oras ida, selu $0,10.

Jornalista   : Arminda Fonseca

Editór         : Francisco Simões

HAKEREK NO HATÁN

Please enter your comment!
Please enter your name here