Diretora Sekretariadu Tékniku PNDS, Claudina Soares Pinto. Imajen TATOLI/Natalino Belo

BAUCAU, 21 setembru 2021 (TATOLI)–Diretora Sekretariadu Tékniku Programa Nasionál Dezenvolvimentu Suku (PNDS), Claudina Soares Pinto, informa, konstrusaun Uma Kbiit Laek  iha munisípiu Manufahi no Liquiçá tama ona faze finál, tanba ne’e sei inaugura iha fulan-outubru.

“Ita halo lansamentu konstrusaun iha fulan-juñu no agostu, nune’e implementasaun durante fulan-tolu de’it, ne’ebé iha munisípiu balun besik atinje 100% ona hanesan munisípiu Manufahi no Liquiçá. Ami-nia alvu fulan-outubru nia laran inaugura ona,” Diretora ne’e hateten iha salaun apuramentu munisípiu Baucau, Villa nova, tersa ne’e.

Notísia relevante: Governu estabelese valór másimu projetu Uma Kbiit Laek

Diretora ne’e observa progresu konstrusaun Uma Kbiit Laek iha territóriu tomak la’o di’ak tebes tanba komunidade antusiazmu maka’as hodi kontribui no asegura projetu ne’e.

Kona-ba prosesu pagamentu, Diretora ne’e esplika, hahú iha fulan-fevereiru, orsamentu transfere ona direta ba konta bankária kada suku, nune’e bainhira kompleta faze dahuluk, ekipa jestaun suku mak sei halo levantamentu atubele halo pagamentu ba kompaña sira.

Munisípiu Manufahi konstrui Uma Kbiit Laek hamutuk 87, kompostu hosi admistrativu haat hanesan Fatuberliu, Same, Alas no Turisca, ne’ebé iha aldeia 87 iha suku 29, ba konstrusaun fíziku ho kustu millaun $1,6, operasionál $87.000 no taxa ba Banku Nasionál Komérsiu Timor-Leste (BNCTL, sigla portugés) $3.132.

Nune’e mós, ba munisípiu Liquiçá, benefisiáriu hamutuk 69 hosi suku 23, hosi postu administrativu Maubara, Liquiçá villa no Bazartete, ho totál orsamentu ba konstrusaun fíziku millaun $1,2,  orsamentu operasionál $69.000 no taxa ba BNCTL $2.484.

Governu liuhosi Ministériu Administrasaun Estatál (MAE) aloka osan ba konstrusaun Uma Kbiit Laek iha territóriu Timor-Leste hamutuk millaun $25 hodi konstrui uma 1.272.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here