Sekertáriu Estadu Formasaun Profesionál no Empregu, Alarico do Rosário, asina akordu aseitasaun ho grupu auto-empregu sira ne'ebé hetan apoiu hosi finanseiru hodi hala’o atividade ekonómika, iha salaun SEFOPE, tersa (21/09). Imajen TATOLI/Francisco Sony

DILI, 21 setembru 2021 (TATOLI)–Sekretaria Estadu Formasaun Profisionál Empregu (SEFOPE) no grupu auto-empregu hamutuk 34 asina termu aseitasaun ba subvensaun públika ho montante totál $408.948,81 hodi finansia atividade ekonómika.

Sekretáriu Estadu Formasaun Profisionál Empregu, Alarico do Rosário, hateten apoiu ne’e bazeia ba proposta ne’ebé aplikante submete ba SEFOPE.

“Montante atu atribui ba kada grupu ne’e depende ba avaliasaun proposta hosi diresaun SEFOPE ba grupu auto-empregu nia atividade,” Sekretáriu Estadu hateten hafoin seremónia asina termu aseitasaun entre parte rua, iha salaun SEFOPE, Caicoli, tersa ne’e.

Grupu sira ne’ebé hetan apoiu finanseiru, durante ne’e halo atividade peska, hakiak ikan, agrikultura, negósiu kiik hanesan loke ofisina inklui atividade sira seluk.

“Ha’u husu ba sira tenke jere osan ba duni atividade sira ne’ebé maka grupu sira halo, nune’e bele garante sustentabilidade, tanba sei iha monitorizasaun hosi parte SEFOPE no instituisaun relevante sira,” nia akresenta.

Iha fatin hanesan, Tezoreira Ofisina Lista Bere, Ana Maria Evaristo Gizela de Fatima, apresia no kontente tanba hetan apoiu finanseiru direta hosi SEFOPE hodi finansia atividade.

“Durante ami loke atividade ofisina, ho tulun hosi SEFOPE ne’e ami sente kontente tanba bele haforsa ami-nia negósiu. Ami sei uza osan ne’e ho di’ak no la’o tuir saida maka ami husu ba SEFOPE hodi bele garante ninia sustentabilidade,” nia hatutan.

Jornalista : Natalino Costa

Editora      : Julia Chatarina 

HAKEREK NO HATÁN

Please enter your comment!
Please enter your name here