Graduasaun UNTL iha auditorium Hera, tersa (21/09). Imajen TATOLI/Egas Cristóvão

DILI, 21 setembru 2021 (TATOLI)–Reitór Universidade Nasionál Timor-Lorosa’e (UNTL), João Soares Martins, husu ba graduadu na’in-349, ne’ebé foin simu graduasaun, atu lori matenek serbí nasaun.

“Ha’u hatene imi hotu mesak matenek de’it. Tanba ne’e, ohin imi bele simu graduasaun, se imi ladún matenek, imi la hatais toga graduasaun ho furak hanesan ne’e. Tanba ne’e, tenki lori matenek atu serbí ema seluk no serbí ita-nia nasaun doben, labele lori matenek halo arbiru de’it no lori matenek bobar ema seluk,” Reitór João apela ba graduadu sira iha auditorium Hera, tersa ne’e.

Reitór UNTL, João Soares Martins. Imajen TATOLI/Egas Cristóvão

Reitór refere ba selebrasaun misa graduasaun ne’ebé hala’o iha fulan kotuk, ho liturjia ne’ebé fó hanoin ba akadémiku UNTL sira atu sai ema matenek no tenki hatene serbí ema seluk.

“Na’i Maromak dehan matenek folin laek iha Maromak futar oin, tanba Na’i Maromak kaer toman ema matenek halo lia bobar. Ne’e duni, garaudadu sira tenki tau iha neon no fuan matenek atu serbí,” nia subliña.

Aleinde ne’e, nia konsidera edukasaun, formasaun no kompeténsia profesionál ne’ebé graduadu sira hetan durante estuda iha universidade, sai hanesan kapitál importante iha karreira profisionál no sei tulun mudansa sosio-ekonómiku iha sosiadade tuir avansu siénsia no teknolojia, ne’ebé la hases norma tradiasaun kulturál.

“Ita no nasaun tenki investe maka’as iha siénsia no teknólojia atu lori ita ba sosiadade moderna no avansadu hanesan sosiadade sira iha nasaun dezenvolvidu sira. Atu atinje ida-ne’e, sidadaun timor-oan hotu iha obrigasaun atu estuda no servisu maka’as hodi aprende barak liután,” nia hatutan.

Ministru Ensinu Superiór Siénsia no Kultura, Longuinhos dos Santos. Imajen TATOLI/Egas Cristóvão

Iha fatin hanesan, Ministru Ensinu Superiór Siénsia no Kultura, Longuinhos dos Santos, komprometidu durante nia mandatu nu’udar membru Governu, sei esforsu nafatin atu tau matan bá Instituisaun Ensinu Superiór sira, atu hadi’a kualidade iha institituisaun sira tanba kualidade iha formasaun mak sei sai futuru di’ak ba nasaun.

“Ha’u felisita Magnífiku Reitór, Vise Reitór, Dosente no Funsionáriu sira iha UNTL, tanba ita-boot sira kria ona kondisaun pedagójika administrativamente ba graduandu sira hodi bele hetan graduasaun. Estudante sira ne’ebé mak konsege akaba estudu iha UNTL sai nu’udar misaun ida hodi hatudu identidade instituisaun públiku ne’e bá sosiadade nia le’et,” Ministru subliña.

Graduasaun UNTL iha auditorium Hera, tersa (21/09). Imajen TATOLI/Egas Cristóvão

Graduadu 349 ne’ebé simu graduasaun, kompostu hosi Fakuldade Agrikultura 46, Fakuldade Edukasaun Arte Unidade 191, Fakuldade Siénsia Sosiál 59, Fakuldade Enjiñaria, Siénsia no Teknolojia 25, Fakuldade Ekonomia no Jestaun 16 no Fakuldade Filojofia Siénsia no Umana 12.

Serimónia gradusaun ne’ebé realiza, kontinua kumpre protokolu saúde hosi Organizasaun Mundiál Saúde no Ministériu Saúde, hanesan uza máskara, kumpre distansiamentu fíziku no fase liman ho sabaun.

Jornalista : Tomé Amado

Editora     : Julia Chatarina

HAKEREK NO HATÁN

Please enter your comment!
Please enter your name here