Komandante Jerál PNTL, Komisáriu Faustino da Costa hala’o vizita ba postu Unidade Polísia Fronteira (UPF) iha liña fronteira hodi haree direita kondisaoens no servisu UPF nian Imajen/Mídia PNTL.

COVALIMA, 21 setembru 2021 (TATOLI)—Komandante Jerál Polísia Nasionál Timor-Leste (PNTL) tersa ne’e hala’o vizita daruak hodi halo avaliasaun ba servisu Komandu PNTL Covalima durante iha pandemia COVID-19 nia laran ne’e.

Komisáriu Faustino da Costa hateten, kna’ar Polisia Nasionál Timor Leste (PNTL) tenke asegura regra prevensaun COVID-19 ne’ebè Governu fò sai no asegura sidadaun sira atu labele hakat liu fronteira no prevene labele halo atividade ilegál.

“Kna’ar PNTL asegura regra prevensaun COVID-19 ne’ebé Governu fó sai, hodi fó apoiu ba membru sentru integradu jestaun krize hodi asegura fatin ne’ebé Ministériu Saúde prepara ba ita-nia sidadaun afetadu COVID-19. PNTL la’os asegura iha kada Komandu ida-idak kona-bá regra Estadu Eemerjénsia tuir protokolu hosi Ministériu Saúde nian de’it, maibé asegura fronteira atu prevene atividade ilegál,” Komisáriu Faustino da Costa hateten liuhosi diskursu, iha Komandu PNTL Covalima, tersa ne’e. 

Komisáriu Faustino da Costa nia vizita iha tempu pandemia COVID-19 hamutuk ho komandante operasaun ba Komandu Unidade hodi implementa no ezekuta dekretu Governu kona-bá medida ezekusaun estadu emerjensia, rezolusaun Governu kona-bá serka sanitária no konfinamentu obrigatóriu (KO) durante ne’e.

Makse númeru afetadu COVID-19 kada loron redús ona no nùmeru óbitu kontinua aumenta ne’e, ejize PNTL esforsu nafatin atu kontinua asegura implementasaun regra prevensaun COVID-19, nune’e sidadaun sira labele hakat liu fronteira ho livre.

“Ha’u apresia no louva servisu ne’ebé ita-bo’ot sira hala’o durante ne’e. Ha’u apresia mós tanba ita-boot sira maioria vasina ona tanba vasina importante. Bainhira kondisaun la permite, tenke aprezenta ba komandu,” nia hateten.

Jornalista : Celestina Teles

Editór       : Cancio Ximenes

HAKEREK NO HATÁN

Please enter your comment!
Please enter your name here