Diretora Sekretariadu Tékniku PNDS, Claudina Soares Pinto. Imajen TATOLI/Natalino Belo

BAUCAU, 21 setembru 2021 (TATOLI)–Diretora Sekretariadu Tékniku Programa Nasionál Dezenvolvimentu Suku (PNDS), Claudina Soares Pinto, hateten, sei mobiliza ekipa téknika hosi nasionál hodi aselera konstrusaun Uma Kbiit Laek (UKL) iha postu Laga no Baguia, munisípiu Baucau.

“Kazu iha munisípiu Baucau tanba kondisaun klima mak prejudika projeitu, tanba ne’e iha atrazu oituan, maibé ha’u husu ona ba ekipa sira no daudaun konsentra uluk lai ba postu seluk ne’ebé bele asesu hafoin ita haree klima di’ak mak hahú mobiliza ekipa tomak hosi nasionál atu aselera iha postu rua ne’ebé tarde hela,” Diretora hateten iha salaun apuramentu munisipál, Villa nova, tersa ne’e.

Nune’e, ekipa sei tau atensaun ba postu haat hanesan Venilale, Vemasse, Quelicai, no Baucau villa, ne’ebé bainhira finaliza sei kontinua fali iha postu Laga no Baguia.

Liuhosi liña koordenasaun ho PNDS munisipál, iha semana oin ekipa téknika no enjeñeiru hosi nasionál sei to’o iha Baucau atu reforsa liután iha área identifikadu implementasaun programa sira iha postu, hafoin konklui mak sei reforsa ba postu rua seluk ne’ebé tarde.

Enkuantu, iha Baucau rasik, PNDS prontu atu inaugura UKL iha fulan-novembru nia laran, tanba ne’e sei iha tempu atu aselera prosesu iha fatin projetu.

“Klima fó dalan bele mobiliza ekipamentu sira, liuliu materiál konstrusaun sira, entaun bele konklui iha tempu badak,” nia akresenta.

Benefisiáriu UKL iha Baucau hamutuk 177, hosi suku 59, iha postu administrativu neen, ne’ebé daudaun servisu atinje ona 24% ba uma hamutuk 114.

Jornalista : Natalino Belo

Editora     : Julia Chatarina

HAKEREK NO HATÁN

Please enter your comment!
Please enter your name here