PA RAEOA, Arsénio Paixão Bano, hala’o fiskalizasun ba projetu perfurasaun sistema bee-moos iha aldeia Sonamnasi, suku Cunha, sub-rejiaun Pante Makasar. Imajen Tatoli/Abílio Elo Nini.

OÉ-CUSSE, 21 setembru 2021 (TATOLI)—Prezidente Autoridade RAEOA, Arsénio Paixão Bano, tersa ne’e hala’o fiskalizasaun ba projetu perfurasaun sistema bee-moos ne’ebé konstrui hosi empreza Nun-Mabun Unipesoál, Lda, iha aldeia Sonamnasi, suku Cunha, sub-rejiaun Pante Makasar, ne’ebé ninia progresu fíziku atinje ona 78%.

Arsénio Paixão Bano, agradese ba empreza Nun-Mabun tanba obra perfurasaun ne’e konstrui ho kualidade tuir padraun autoridade nian hodi fornese bee-moos no benefisia komunidade uma kain 182 ho populasaun 850 iha aldeia Sonamnasi.

PA RAEOA, Arsénio Paixão Bano, hasai retratu gamutuk ho populasaun hafoin hala’o fiskalizasun ba projetu perfurasaun sistema bee-moos iha aldeia Sonamnasi, suku Cunha, sub-rejiaun Pante Makasar. Imajen Tatoli/Abílio Elo Nini.

“Ita agradese ba empreza tanba halo projetu ida ho kualidade tebes. Ida-ne’e autoridade nia hakarak atu rezolve problema bee-moos iha komunidade. Autoridade hakarak populasaun sira tenke asesu ona bee-moos iha tinan ne’e ba tinan sira tuir mai. Ita gasta osan la saugate. Projetu ne’e sei benefisia direita ba populasaun iha Sonamnasi sei la hemu-tán ona bee-mota maibé sei uza ona bee-moos ne’e,” Prezidente Autoridade RAEOA ne’e hateten ba populasaun sira iha aldeia Sonamnasi.

Rezultadu perfurasaun sistema bee-moos iha Sonamnasi ne’e hatudu katak nia volume bee 100 mil litru ho nia debitu bee-moos nian litru 5/segundu, ida-ne’e sei fó benefisia ba komunidade iha aldeia Sonamnasi hamutuk uma kain 182 ho totál populasaun 850.

Prezidente Autoridade RAEOA epela ba ba komunidade no autoridade lokál iha suku Cunha, aldeia Sonamnasi, atu kuidadu perfurasaun bee-moos ho didi’ak, labele estraga maibé presiza tau atensaun tanba autoridade konstrui obra ne’e nu’udar patrimonia públiku ne’ebé fó benefisia direta ba komunidade, nune’e labele halerik-tán bee-moos.

Iha 2021 ne’e autoridade konsege halo prejetu perfurasaun bee-moos iha iha sub-rejiaun Pante Makasar, Oésilo, no Nitibe. Daudaun ne’e autoridade planea ona atu konstrui perfurasaun bee-moos iha sub-rejiaun Pasabe, tanba autoridade hakarak rezolve uluk problema bee-moos, edukasaun, saúde no infraestrutura bazika hanesan estrada rurál.

Diretór empreza Nun-Mabun Unipesoál, Lda, Acalu Nunes, informa katak obra ne’e nia servisu fiziku finaliza ona hanesan tanke bee ho nia medida metru 5×10, no daudaun ne’e sei halo hela kanu transimisaun kanu atu distribui ba torneira hamutuk unidade 14 iha aldeia Sonamnasi.

Xefe Suku Cunha, Domingos Seco Caunan, hato’o agradese ba autoridade RAEOA tanba durante tinan barak populasaun sira iha aldeia Sonamnasi garantia de’it ba bee-mota hodi konsumu no barak liu komunidade uza de’it bee-posu, maibé ho perfurasaun bee-moos ne’e bele tulun ona komunidade atu asesu bee-moos ho fasil.

“Ami agradese ba autoridade tanba bele konstrui ona fasilidade bee-moos nian iha ami nia aldeia ne’e,” lidér komunitáriaa ne’e agradese.

Entretantu obra ne’e konstrui hosi Empreza Nun-Mabun Unipessoal, Lda, ho nia kustu kontratu hamutuk $156,325,73 ho durasaun servisu fulan-neen.

Jornalista : Abílio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here