Ministériu Justisa (MJ), fó kapasitasaun ba guarda prizionál iha estabelesimentu prizaun Becora, kona-bá disiplina, direitu no devér, tersa (21/09/21). Imajen Tatoli/Nelson de Sousa.

DILI, 21 setembru 2021 (TATOLI)—Ministériu Justisa (MJ), fó kapasitasaun ba guarda prizionál iha estabelesimentu prizaun Becora, kona-bá disiplina, direitu no devér.

Formasaun ne’e ho tema, ‘hasa’e  kontrolu internu no aprofunda koñesimentu ba regra vijente no prosedimentu iha estabelesimentu prizionál Timor-Leste, ámbitu Ministériu Justisa’.

Notísia relevante:2022, MJ konstrui prizaun foun iha Oeberek

“Formasaun ne’e atu mellora tan serbisu guarda prizionál ne’ebé  importante, hodi bele kondús no muda mentalidade dadur-sira,” Ministru Justisa, Manuel Cárceres da Costa, hateten iha nia diskursu abertura formasaun refere iha prizaun Becora, tersa ne’e.

Manuel Cárceres da Costa husu, atu aproveita tempu ho didi’ak bainhira hetan tiha formasaun bele aplika fali iha serbisu fatin.

Governante ne’e agradese ba ekipa ministériu nian ne’ebé realiza atividade ne’e ho apoiu hosi Komisaun Funsaun Públika (CFP, sílga portugés).

Nune’e mós Inspetór Jerál Guia Gabinete Auditoria MJ, Lucas da Costa, hateten formasaun ne’e realiza tanba bazeia ba rezultadu avaliasaun serbisu gabinete inspesaun auditoria, liu hosi atividade inspesaun no investigasaun durante 2018 to’o agora deskobre guarda prizionál balun halo knaar la tuir regra prosedimentu lei ne’ebé aplika iha prizaun laran liuliu komete infrasaun disiplinár.

“Iha guarda prizionál na’in-tolu iha prizaun Becora hetan prosesu disiplinár no estabelesimentu prizionál Suai daudaun loke hela prosesu investigasaun,” nia heteten.

Hosi deskobrimentu ne’e maka MJ halo formasaun ba guarda prizionál nu’udár planu asaun anuál atividade tinan 2021 define ba liña jerál no orientasaun.

Formasaun ne’e hahú iha 21 to’o 28 setembru tinan ne’e, partisipa hosi guarda prizionál, xefe, ofisiál hamutuk na’in 130.

Matéria formasaun ne’e iha mós oradór mai hosi Komisaun Funsaun Públika, Polísia Sientífika Investigasaun Kriminál, jurista hosi MJ rasik no seluk tán.

Antes ne’e, MJ halo formasaun hanesan ba iha guarda prizionál sira iha Gleno no Suai.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here