Institutu Nasionál de Saúde (INS) fo formasaun kona-bá partu moos no seguru, ba médiku no parteira sira iha munisípiu Bobonaro, tersa (21/09/21). Imajen Tatoli/Sérgio da Cruz.

BOBONARO, 21 setembru 2021 (TATOLI)—Institutu Nasionál Saúde (INS), fó formasaun ba médiku no parteira-sira iha munisípiu Bobonaro, kona-bá ‘partu moos no seguru’.

Objetivu hosi formasaun ne’e, atu aumenta koñesimentu no abilidade médiku ho parteira-sira nian kona-bá atendimentu di’ak liu tán ba komunidade iha baze.

Notísia relevante:Telkomcel oferese ambulánsia ida ba MS 

“Formasaun ne’e hanesan programátiku INS tenke hala’o kada tinan ba profisionál saúde, liu-liu parteira no médiku-sira atu bele fó tratamentu di’ak ba ita-nia inan isin-rua sira, hodi bele partu ho seguru,” Diretór Administrasaun Finansa no Aprovizionamentu INS, Jacinto de Oliveira Guterres, hateten ba jornalista-sira iha salaun enkontru CVTL Bobonaro, tersa ne’e.

Formasaun durante loron 10 ne’e, formadór-sira sei fahe máteria espesífiku liu ba partu seguru, nune’e profisionál saúde sira bele foti desizaun ruma hodi solusiona problema ne’ebé inan isin-rua hasoru iha situasaun difísil.

Matéria ba partu normál no seguru sempre iha mudansa, tanba ninia prosedimentu sempre iha mudansa hosi grupu 54 sa’e ba 60, no tun fila-fali.

Tanba ne’e, INS realiza formasaun ne’e atu halo adaptasaun tuir protokolu OMS, hodi kapasita médiku no parteira-sira, iha área partu moos no seguru.

Bainhira remata formasaun, profisionál saúde hirak-ne’e bele sai ema ne’ebé profisionál liutan no iha kompeténsia, bele sai fali formadór ba médiku no parteira sira seluk, maibé tenke kompleta tan  formasaun Training of Trainer (ToT).

“Sira ne’e ami sei hili fila fali, ida ne’ebé valór di’ak liu, nia mak selesionadu atu sai formadór,” nia dehan.

Partisipante, médiku Evaristo Fernandes Soares, agradese ba INS, tanba liuhosi formasaun ne’e bele hakbi’it liu tan koñesimentu.

Nia mós promete sei utiliza máteria ne’ebé iha liuliu matenek ne’ebé hetan, sei aplika iha serbisu lorloron iha terrenu.

Formasaun ne’e mós hala’o ona iha munisípiu 12 inklui Rejiaun Administrativa Espesiál Oé-cuse Ambeno (RAEOA).

Médiku no parteira ne’ebé partisipa iha formasaun ne’e hamutuk na’in 15, mai hosi Hospitál Referál Maliana, no Sentru Saúde iha postu administrativu neen iha munisípiu Bobonaro.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here