Tékniku EDTL halo instalasaun eletrisidade iha área Bebora, Dili. Imajen TATOLI/António Gonçalves

DILI, 21 setembru 2021 (TATOLI)–Reprezentante Povu iha uma fukun Parlamentu Nasionál (PN) kestiona maka’as rede Timor Telecom (TT) iha Postu Administrativu Ataúro (futuru munisípiu espesiál) tanba ahi mate halo rede operadór telekomunikasaun Timor-Telecom mós la funsiona.

Notísia Relevante: PN kestiona rede internet Timor Telecom-Telemor

Deputadu Ricardo Baptista, hateten iha Ataúro iha sentrál elétrika ida-ne’ebé la’o durante tinan barak maibé tanbasá iha orsamentu 2021 la prevee verba ba sentrál elétrika refere, tanba iha Ataúro ne’e ahi lakan ho oras 18 tiha ona, foin tinan ida liubá ahi la lakan tiha ona no agora lakan oras lima de’it.

“Agora, Timor Telecom ninia rede iha Ataúro sai problema boot. Kuandu ahi moris rede iha, ahi mate rede Timor Telecom mós mate. Ida-ne’e la’ós foin mak akontese maibé kleur loos ona. Komunidade Ataúro lamenta ida-ne’e maibé to’o agora problema ne’e kontinua mosu nafatin,” Ataúro-oan ne’e levanta liuhosi plenária, tersa ne’e.

Deputadu Bankada CNRT ne’e husu Governu atu komunika ho operadór Timor Telecom atu solusiona problema ne’e no labele izola fali Ataúro ho situasaun sira hanesan ne’e.

Entretantu, Deputada Virgínia Ana Belo hateten Atauro ne’ebé atu sai munisípiu espesiál maibé oras ne’e hasoru problema ahi no rede TT la funsona.

“Rede Timor Telecom kuandu eletrisidade mate, entaun rede Timor Telecom la funsiona to’o tuku 07.00 kalan foin funsiona fali,” nia dehan.

Hatán ba preokupasaun ne’e, Ministru ba Asuntu Parlamentár no Komunikasaun Sosiál, Francisco Jerónimo hateten nia parte sei enkamiña ba entidade relevante.

Tuir observasaun Agência TATOLI durante ne’e katak kliente hosi Timor Telecom barak mak lamenta ho rede hosi operadór ne’e tanba rede lentu demais, no situasaun ne’e halo kliente sira hato’o preokupasaun liuhosi rede sosiál.

Notísia Relevante: Problema ahi mate, EDTL,E.P prepara planu inspesaun rutina ba feeder

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here