Abitante afetadu partisipa sosiizasaun identifikasaun rai no propriedade ba projetu armazenamentu kombustível iha aldeia Manuleu, Metinaro, tersa (21/09) Imajen TATOLI/Florêncio Miranda Ximenes

DILI, 21 setembru 2021 (TATOLI)-Governu liuhosi ekipa inter- ministeriál hahú halo sosializasaun ba identifikasaun rai no propriedade projetu konstrusaun armazenamentu kombustível ba abitante afetadu iha aldeia Manuleu, suku Wenunuk, postu administrativu Metinaro, munisípiu Dili.

Tuir Ministru Petróleu no Minerál, Víctor da Conceição Soares, Governu hakarak asegura enerjétika nasionál tanba durante ne’e la asegura fornesimentu, nune’e daudaun husu partisipasaun entidade hotu hodi kontribui aselera prosesu.

Sosiizasaun identifikasaun rai no propriedade ba projetu armazenamentu kombustível iha aldeia Manuleu, Metinaro, tersa (21/09) Imajen TATOLI/Florêncio Miranda Ximenes

“Ha’u husu ba ekipa no abitante afetadu sira atu kontribui hodi halo identifikasaun rai no proriedade atubele konstrui armazenamentu kombustível  ho di’ak,” Ministru hateten iha ámbitu sosializasaun iha aldeia manuleu, Metinaro, tersa ne’e.

Ekipa konjunta ba atividade ne’e kompostu hosi Ministériu Petróleu no Minerál, Timor Gás no Petróleu Empreza Públika, (Timor GAP, E.P) Ministériu Justisa (MJ), Ministériu Agrikultura no Peska (MAP), Ministériu Administrasaun Estatál (MAE), Ministériu Obra Públika, Ministériu Interiór (MI) no Sekretaria Estadu Arte Kultura (SEAK).

Notísia relevante: Timor GAP, E.P hahú fornese kombustível ba sentrál elétrika Betano

VIII Governu konstistitusionál inisia konstrusaun terminál kombustível atu garante  stock enerjia nasionál ba fulan-tolu ka loron 120, ba komersializasaun Timor GAP, E.P.

“Governu hakarak populasaun iha área ne’e sai sujeitu ka hetan benefísiu hosi projetu armazenamentu kombustível, liuliu impaktu sosiu-ekonómiku no ambientál,” nia akresenta.

Ekipa liña ministeriál nakloke ba reklamasaun

Iha fatin hanesan, Prezidente Konsellu Administrasaun Timor GAP, E.P, António José Loiola, hateten, empreza estatál ne’e ho ekipa liña ministeriál nakloke ba abitante afetadu sira atu hato’o reklamasaun bainhira halo identifikasaun ba rai no proriedade.

“Ha’u hakarak projetu ne’e fó benefísiu ba povu, nune’e husu atu abitante afetadu sira atu hato’o reklamasaun parsela hodi bele rezolve no fó indemniazsaun molok hahú konstrusaun,” nia apela.

Tuir planu, Timor GAP sei konstrui armazenamentu konbustível ne’ebé kompleta ho jetty (ponte kais), pipeline (kadoras), Tank farm (armazenamentu) no onshore pipeline hosi Metinaro to’o sentrál elétrika Hera, sentru laboratóriu nasionál jeolójia no sentru prosesamentu Liquefied Natural Gas (LNG).

Nune’e mos, Diretór Jerál Terra Proriedade, Rodrigo de Mendoca, husu ba abitante afetadu sira atu prepara dokumentu hodi aprezenta, nune’e bele rezolve tuir dalan legál, bainhira ekipa konjuta halo identifikasaun ba rai no proriedade ektare 186.

“Ita-nia Diresaun Terra no Propriedade entrega ona rai ektare 186 ba Timor GAP, maibé tuir dezeñu iha faze dahuluk uza de’it ektare 80, ne’ebé iha parsela kuaze ektare 75. Nune’e tenke prepara dokumentu aprezenta hodi rezolve no fó indemnizasaun,” nia hatutan.

Abitante afetadu apoiu konstrusaun

Prezidente Autoridade munisípiu Dili, Guilermina Filomena, agradese ba Governu sentrál tanba fihir aldeia manuleu, Metinaro sai fatin armazenamentu kombustível hodi asegura enerjia nasionál.

“Ha’u lori populasaun nia naran, agradese ba Governu tanba hili fatin ne’e sai área investimentu hodi fó benefísiu ba komunidade iha área ne’e no populasaun Timór laran tomak,” nia agradese.

Nune’e, Prezidente Autoridade husu ba populasaun afetadu atu kontribui iha prosesu identifikasaun atubele fó indemnizasaun molok halo konstrusaun.

Abitante afetadu, Alfredo Fernandes Soares, husu ba ekipa konjuta interministeriál atu envolve abitante afetadu sira iha prosesu identifikasaun rai no propriedade hodi  projetu ne’e labele fó risku ba komunidade nia moris.

“Ami husu atu fó seguransa maka’as bainhira projetu armazenamentu la’o hodi labele fó risku ba komunidade iha área ne’e bainhira dezastre ruma akontese,” nia sujere.

Maski nune’e, abitante ne’e orgullu ba projetu tanba bele benefisia Estadu Timor-Leste, maibé tenke fó solusaun ba afetadu sira liuliu fó servisu ba abitante lokál.

Nune’e mós, Abitante afetadu, Joana dos Santos, husu ba akipa konjuta atu fó atensaun sériu ba ai-akadiru sira ne’ebé afetadu ba projetu, tanba durante ne’e fó benefísiu ekonómiku ba komunidade.

“Ha’u husu atu halo identifikasaun karik presiza haree mós ai-akadiru sira, tanba durante ne’e ami halo ba lafatik hodi fa’an no hetan osan,” nia hatutan.

Tuir Abitante, Antonio Da Costa, komunidade Manuleu prontu  kontribui halo identifikasaun rai no prioridade,maibé presiza halo identifikasaun ho di’ak hodi komunidade labele sai vítima ba projetu ne’e.

Jornalista : Florêncio Miranda Ximenes

Editora     : Julia Chatarina

HAKEREK NO HATÁN

Please enter your comment!
Please enter your name here