Vise-Ministru Administrasaun Estatál, Lino de Jesus Terrezão. Imajen Tatoli/Francisco Sony

DILI, 21 setembru 2021 (TATOLI)—Vise Ministru Administrasaun Estatál (MAE), Lino de Jesus Torrezão, hateten Avenida Liberdade Imprensa ne’e hosi rotunda Merkalu Lama to’o rotunda Becora maibé habadak tiha no to’o iha Kulu-Hun tanba Avenida iha urbana regula ho Rezolusaun Governu núméru 42/2015.

Nia hateten, ida-ne’e sai preokupasaun boot tanba iha tempu ne’ebá ne’e mosu ona Dirasaun Jerál Ordenamentu Territoriál no Dirasaun Toponómia hodi tau naran ba Rua no dalan sira-ne’ebé mak iha, entaun Avenida Liberdade Imprensa ho Avenida sira seluk iha Dili ne’e regula ho Rezolusaun Governu Nú. 42/2015 ne’ebé legalmente kontempla iha Dekretu Lei númeru 29/2016 ne’ebé ko’alia kona-bá naran aruamentu ka estrada no númeru ba uma.

“Iha momentu ne’ebá naran sira iha Dili laran seidauk iha, no ema ida-idak tau naran konforme sira-nia hakarak. Tanba ne’e, regulamentu ne’e mosu hodi guia ita hotu sobre naran aruamentu hotu iha teritóriu tomak, inklui Avenida Liberdade Imprensa,” Vise-Ministru MAE ne’e hateten ba jornalista sira bainhira partisipa iha lansamentu plaka Avenida Liberdade Imprensa iha rotunda Merkadu Lama, Dili, tersa ne’e.

To’o ohin loron, iha teritóriu nasionál eseptu Rejiaun Asministrativa Espesiál Oé-Cusse Ambeno (RAEA), ne’ebé mak iha ona sira-nia naran aruamentu rasik no munisípiu sira komesa ona ho preparasaun ba kolokasaun númeru uma nian.

Antes ko’alia kona-bá Avenida ida-ne’e, presiza komprende uluk lai artigu 3 Dekretu-Lei Númeru 29/2019 ne’ebé hateten katak tipu aruamentu ne’e hamutuk iha haat (4) mak Avenida, Rua, Travesa no Beco.

Avenida mak hanesan estrada ho dimensaun boot ne’ebé inklui mós estrada protókolu sira (ezemplu hanesan Avenida Nicolau Lobatu ne’ebé hahú hosi rotunda Comoro to’o mai iha Otél Timor nia sorin), Rua mak estrada ho dimensaun natoon, inklui estrada prinsipál sira-ne’ebé liga husi Avenida ida ba Rua sira seluk.

Travesa mak estrada ka aruamentus ho dimensaun kiik ne’ebé liga ba Avenida ka Rua sira seluk, no Beco mak hanesan interseksaun ida-ne’ebé liga ho aruamentus seluk ne’ebé ho dimensaun kiik iha sidade Dili laran.

Totál Avenida hamutuk 22 no Avenida Liberdade da Imprensa ninia Mapamentu hahú husi rotunda Estatua Francisco do Amaral no ramata iha kruzamentu ponte Kulu-Hun nian.

Ne’e hanesan naran foun ne’ebé anteriormente ho naran antiga rua 15 de Outubro, ninia elevasaun hosi tipo aruamentu Rua ba Avenida tanba aruamentu ida-ne’e hanesan estrada protókolu hodi fo omenajen ba valór comun hosi nasaun demokrátiku sira hotu.

Tanba ho rezolusaun ida-ne’e mak Avenida Liberdade Imprensa habadak tiha ne’ebé mak hahú hosi rotunda Merkadu Lama ba to’o iha kruzamentu ponte Kulu-Hun nian de’it.

Jornalista : Osória Marques

Editór       : Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here