Autoridade RAEOA realiza serimónia asina termu entrega ba funsionáriu foun na’in-37 hodi entrega ba xefe sentru saúde sira hosi sub-rejiaun. Imajen Tatoli/Abílio Elo Nini.

OÉ-CUSSE, 21 setembro 2021 (TATOLI)—Autoridade RAEOA liuhosi Sekretáriu Rejonál Asuntu Saúde, tersa ne’e realiza serimónia asina termu entrega ba funsionáriu foun na’in-37 hodi entrega ba xefe sentru saúde hosi sub-rejiaun Pante Makasar, Oésilo, Pasabe no Nitibe, hodi fó asistensia primária saúde iha sentru saúde no postu saúde sira.

Notísia Relevante: Menus rekursu umanu, servisu saúde RAEOA rekruta funsionáriu 54

“Autoridade entrega funsionáriu foun hamutuk 37 atu reforsa-tán servisu Sentru Saúde sira iha sub-rejiaun haat, atu bele presta servisu di’ak liután iha baze. Bazea ba analize situasionál, RAEOA enfrenta menus rekursu umanu liu-liu iha sentru saúde no postu saúde sira. Tanba ne’e, ho imi nia prezensa bele fó asistensia saúde primária di’ak liután iha baze,” Sekretáriu Rejionál Asuntu Saúde, Manuel da Costa, hateten iha Sikluli, Oé-Cusse.

Objetivu autoridade nian mak presiza destaka tán funsionáriu saúde iha baze, atu fó asistensia saúde di’ak, kualidade, hakbesik liu atendimentu saúde ba komunidade hodi presta servisu di’ak liután, nune’e bele redús taxa morbilidade no mortalidade. 

“Ha’u husu, ita hotu servisu ho responsabilidade, hatudu dixiplina tuir pozisaun ida-idak nian, servisu hamutuk ho médiku seniór, enferemeira no parteria sira iha Sentru saúde no Postu Saúde sira. Koordena ho lideransa komunitáriu no parte relevante sira, ho nune’e ita-nia atendimentu asisténsia saúde iha terrenu la’o ho efetividade tuir padraun Ministériu Saúde nian,” nia apela.

Importante tebes ba profisionál saúde sira daudaun ne’e tama ona iha ajente administrasaun públika, nune’e presiza kaer metin lei Funsaun Públika, servisu ho profisionál lahó diskriminasaun, laiha kór politika, rasa, suku, jeneru no relijiaun maibé atendimentu hanesan.

Funsionária foun, dra. Graziela da Silva Pereira, hateten nia parte admira no garante sei ezerse kbi’it ho responsabilidade tuir kompromisiu servisu saúde nian, atu fó atedimentu dignu ho dixiplina ba komunidade iha área izoladu sira.

Funsionária foun, dra. Graziela da Silva Pereira. Imajen Tatoli/Abílio Elo Nini.

“Ha’u-nia fatin servisu koloka iha sub-rejiaun Nitibe, maibé hanesan servidór iha servisu saúde nian, ha’u prontu atu hala’o kna’ar ho responsabilidade hodi servi tuir orientasaun Ministério Saúde liuhosi autoridade RAEOA nian. Ami garante no espera ohin koloka ona ami iha fatin ketak-ketak, iha sub-rejiaun sira bele eleva prestasaun kuidadu primária saúde iha Oé-Cusse nakonu ho domin no dixiplina,” nia dehan.

Entretantu totál funsionáriu kontratadu foun ne’ebé autoridade rekruta iha tinan 2021 ne’e hamutuk na’in-47, kompostu hosi médiku-médika jerál, infermeiru no infermeira, farmasista, partéria, saúde públika, nútrisaun, ho tékniku administrasaun.

Funsionáriu na’in-47 ne’e na’in-10 destaka ona iha Hospitál Referal Oé-Cusse no na’in-37 destaka sira iha Sentru Saúde haat no Postu Saúde 19 iha teritorriu Oé-Cusse.

Partisipa iha seremómia asina termu entrega ne’e mak xefe Sentru Saúde sub-rejiaun Pante Makasar, Oésilo, Pasabe no Nitibe.

Jornalista : Abílio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here