Diretor Ezekutivu Asosiasaun Halibur Defisiénsia Matan Timor-Leste (AHDMTL), Gaspar Afonso.Imajen/Joanico de Araújo.

DILI, 21 setembru 2021 (TATOLI)—Diretór Ezekutivu Asosiasaun Halibur Defisiénsia Matan TimorLeste (AHDMTL), Gaspar Afonso, hateten AHDMTL sei kria atividade hortikutura iha Tibar hodi kuda modo ba nesesidade atu konsumu no bele faan balun iha merkadoria.

“Aminia planu kria atividade hortikultura atu sustenta ema ho defisiénsia matan sira-ne’ebé mak mai tuir treinamentu iha Dili. Tanba ita iha asrama feto no mane. Entaun, iha hortikultura ne’e ita sei hakiak manu, ikan, fahi, no kuda modo, hodi nune’e balun ita hodi bele han no balun bele distribui ba merkadória, hodi nune’e bele fó benéfisiu filafali ba tékniku sira ne’ebé hola parte iha hortikultura ne’e,” Gaspar Afonso, hateten ba Agência Tatoli, via telefónika, tersa ne’e.

Ba kestaun ne’e, AHDMTL halo ona audiénsia ho Organizasaun ba Ai-han no Agrikultór (FAO) hodi husu FAO atu bele fasilita treinamentu tékniku agrikultura ba membru AHDMTL, atu ba futuru bele iha tékniku ne’ebé di’ak hodi halo hortikultura.

“Liuhosi ami-nia audiénsia ne’e, FAO informa fila-fali ba ami, atu ami tenke liu fali hosi Ministériu Agrikultura tanba sira labele servisu direita ho ami liga ba atividade hortikultura nian. Entaun sira dehan bele ko’alia ho Ministériu Agrikultura no liuhosi sira mak halo pedidu ba FAO atu FAO bele servisu hamutuk ho ami,” nia informa.

Maske AHDMTL iha ona rai, maibé tenke iha treinamentu no iha fasilidade, entaun AHDMTL sei halo parseria ho Ministériu Agrikultura atu bele fasilita no bele fó treinamentu ba AHDMTL nia ema sira.

“Aminia planu iha fulan outrubru ne’e, ami haruka ona karta ba Ministériu Agrikultura, hodi halo kooperasaun liga ba atividade hortikultura nian,” nia dehan.

Entretantu, tuir dadus hosi Asosiasaun Halibur Defisiénsia Matan TimorLeste (AHDMTL), iha tinan 2011 to’o 2021, totál ema defisiénsia matan iha Timor hamutuk 277 ne’ebé kompostu hosi feto na’in132 no mane na’in145.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here