Distribuisaun Cesta Bázika. Imajen Tatoli/Dok.

DILI, 20 setembru 2021 (TATOLI)—Xefe Suku Bebunuk, Postu Administrativu Don Aleixo, Munisípiu Dili, Serafím Macedo, hateten to’o agora reklamante xefe família 200-resin iha suku Bebonuk seidauk simu cesta bázika.

“Reklamante suku Bebonuk iha xefe família 200-resin ho nia abitante 1000-resin mak to’o agora seidauk simu sira-nia direitu ba cesta bázika. Maibé ami kontaktu no konfirma ona ba parte Ministériu Turzimu Komérsiu Indústria (MTCI-sigla portugés) katak sira simu ona lista reklamante atu nune’e bele distribui iha tempu badak,” Xefe Suku Bebonuk hateten ba Agência TATOLI, bainhira partisipa serimónia tomada de pose ba Prezidente Autoridade Munisípiu Dili iha Administrasaun Munisipál Dili, segunda ne’e.

Durante ne’e, reklamante sira-ne’ebé seidauk simu sira-nia direitu ne’e sempre kontaktu nafatin autoridade lokál no hosi parte Governu mós informadu ona, katak iha setembru nia-laran ne’e Governu bele distribui ona cesta bázika ne’e ba reklamante sira.

Suku Bebonuk iha aldeia lima mak Aldeia Metin Um, Metin Dois, Metin Três, Metin Quatro no Aldeia Metin Cinco ho nia xefe família 3000-resin no abitante hamutuk rihun 15-resin.

Entretantu Xefe Suku Mantelulão, Postu Administrativu Metinaro, Munisípiu Dili, Sérgio Lopes Sarmento Dias, husu Governu atu aselera apoiu cesta bázika ba reklamante sira iha suku refere.

“Iha fulan-setembru ne’e mak distribuisaun cesta bázika ba ita-nia reklamante hamutuk uma kain neen (6) mak seidauk realiza, ita prontu apoiu sira no husu nafatin ba ministériu relevante atu aselera distribusaun cesta bázika ne’e ho lalais,” Xefe suku ne’e hateten.

Maske reklamante sira hein kleur, maibé Xefe Suku Mantelulão nafatin agradese ba VIII Governu Konstitusionál tanba iha inisiativa hodi fó apoiu cesta bázika ba komunidade iha esituasaun pandemia COVID-19 ne’e.

Suku Mantelulão iha aldeia neen (6) mak Aldeia Sahe, Hirau-Matan, Has Laran, Lebutun, Sabuluin no Aldeia Mantelelão ho uma-kain 456 no abitante hamutuk 2.098.

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here