Uma Tradisionál (Casa típica) hosi Munisípiu Lautém kuaze koñesidu iha mundu ne’ebé reprezenta Timor-Leste no sai símbolu ba Timor-Leste nian. Imajen/Espesiál.

LAUTÉM, 20 setembru 2021 (TATOLI)Sekretáriu Estadu Juventude no Desportu (SEJD), Abrão Saldanha, observa katak, ezekusaun programa emprendorizmu iha sentru juventude munisípiu Lautém, atinje ona 80%.

“Programa emprendorizmu sosiál inisiativa rasik hosi joven-sira atinje ona 80%. Maibé joven-sira sei serbisu makás ho autoridade lokál-sira atu Governu haree ida ne’ebé mak bele estimula,” Abrão Saldanha, hateten ba jornalista iha Lospalos, segunda ne’e.

Notísia relevante:Sentru joventude Viqueque ezekuta ona fundu SEJD 40%

Progreseu no atinjimentu persentajen ne’e, Abrão Saldanha fó-sai hafoin hala’o vizita iha sentru juventude ne’e.

Maski la esplika detalla kona-bá tipu programa no atividade ne’ebé sentru juventude ne’e hala’o iha programa emprendorizmu, maibé Sekretáriu Estadu ne’e dehan, bainhira halo fali verifikasaun ba atividade sira, buat hotu la’o di’ak.

“Ita vizita fatin ne’e tanba sira mós parseiru hosi Governu, ne’ebé iha programa ba joven-sira, liu-liu programa emprendorizmu, ita mai atu check fila-fali,” nia hateten.

Tuir planu, parte sentru juventude mós prepara ona hela Information Communication and Technology  (ICT) camp ne’ebé sei organiza iha Lautém inklui atividade regulár seluk hanesan formasaun lian-inglés no seluk tán ba joven-sira.

Orsamentu ne’ebé SEJD fó ba sentru juventude Lautém hodi hala’o programa emprendorizmu hamutuk rihun $55.

Kada tinan, SEJD mós  apoia osan besik rihun $30 hodi suporta atividade no serbisu operasionál sentru juventude ne’e.

Iha fatin hanesan, jestór sentru juventude Lautém, Idelfonso da Costa, hateten programa ne’ebé SEJD apoiu fundu durante ne’e la’o di’ak tebes.

“Durante ne’e programa emprendorizmu la’o di’ak hela iha Lautém, programa ne’e sira harii rasik atividade kreativu-sira no fó fali serbisu ba ema seluk,” nia dehan.

Jornalista: Hortencio Sanchez

Editór: Cipriano Colo

HAKEREK NO HATÁN

Please enter your comment!
Please enter your name here