Motór ho karreta hamutuk 69 ne’ebé Polísia Nasionál Timor-Leste (PNTL), liuhosi Unidade Tránzitu, munisípiu Dili, halo apreensaun iha fim de semana (18-19) setembru, para hela iha komandu Caicoli. Imajen Tatoli/Nelson de Sousa.

DILI, 20 setembru (TATOLI)—Polísia Nasionál Timor-Leste (PNTL), liuhosi Unidade Tránzitu, munisípiu Dili, halo apreensaun ba motór 56 ho karreta 13.

Ekipa Tránzitu, halo apreensaun ba viatura hirak-ne’e, bainhira hala’o operasaun iha sábadu ho domingu semana nia rohan, iha área Merkadu-Lama oin ho Caicoli.

Notísia relevante:Polísia Tránzitu halo apreensaun ba motór 66

Viatura hirak-ne’e viola lei kódigu estrada, hanesan dokumentu laiha, la uza espellu, laiha xapa matríkula no uza kanu-resin.

“Iha operasaun, ita pasa nota infrasaun ba motorista-sira, hodi bele ba selu direta iha Banku Nasionál Komérsiu Timor-Leste (BNCTL, sígla portugés) no veíkulu lori mai Komandu. Bainhira selu ona mak sei foti fali,” Komandante Tránzitu munisípiu Dili, Inspetór Polísia, Domingos Sarmento, hateten ba jornalista-sira iha kna’ar fatin, Caicoli, segunda ne’e.

Infatór sira ne’e selu koima ho valór másimu $60 to’o $120, no Polísia Tránzitu kontinua hala’o operasaun rutina iha kapitál Dili, hodi  garante implementasaun lei kódigu estrada ba sidadaun hotu atu kumpre.

Iha períudu Estadu emerjénsia, polísia Tránzitu tolera sidadaun ne’ebé dokumentu transporte inválidu no tama hikas ba tempu normál, sei laiha toleránsia.

Tanba ne’e, Komandante ne’e husu sidadaun hotu atu hakbesik an ba iha Diresaun Nasionál Transporte Terrestre (DNTT), hodi trata dokumentu, tanba agora funsionamentu atendimentu públiku la’o normál.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here