Komunidade Aldeia Mota-Ulun, suku Becora, postu administrativu Cristo Rei, Munisípiu Dili, atu hala’o limpeja jerál. Imajen Tatoli/Nelia Fernandes.

DILI, 20 setembru 2021 (TATOLI)—Xefe Suku Becora, António da Silva Soares, hateten Programa Nasaun Unida ba Dezenvolvimentu (PNUD) fó apoia $13.200 ba komunidade Aldeia Mota-Ulun, suku Becora, postu administrativu Cristo Rei, Munisípiu Dili, atu hala’o limpeja jerál hodi hadi’a valeta no fatin sira-ne’ebé afetadu hosi inundasaun iha 04 abril 2021.

Nia hatutan, limpeza jerál ne’e hala’o ho objetivu atu prevene inundasaun labele akontese tán iha área refere bainhira udan monu rai no hatoman komunidade halo limpeza hodi hamoos valeta no hamoos lixu iha mota laran tau iha nia fatin.

“Limpeza iha aldeia Mota-Ulun ne’e, hanesan programa PNUD nian atu hadi’a valeta no fatin sira-ne’ebé afetadu hosi inundasaun iha 04 abril 2021. Iha ema na’in-120 mai hosi aldeia Mota-Ulun mak responsabiliza halo limpeza jerál ne’e,” António da Silva Soares hateten ba Agência Tatoli, via telefónika, segunda ne’e.

Xefe Suku ne’e sujera ba PNUD atu hamatan mós ba aldeia sira seluk ne’ebé afetadu ba inundasaun ne’ebé akontese iha loron 04 abril 2021 ne’e, hanesan Aldeia Darlau, Becusse Craik, Becusse Sentru, Kakeu Laran no aldeia Klak Fuik.

Xefe Aldeia Mota-Ulun, Luis do Carmo Soares, informa traballadór na’in 120 ne’e hosi aldeia Mota-Ulun ne’ebé hala’o limpeza jerál iha mota laran no valeta-sira, tanba iha loron 04 abril ne’e rai monu maka’as no taka netik mota no bee-dalan.

Atividade limpeja jerál iha bairru laran ne’e hala’o durante fulan ida-nia laran, ne’ebé sei hamoos fatin balun tan hanesan sede aldeia, simetériu no gruta sira-ne’ebé konstrui iha aldeia ida-ne’e nia laran.

Traballadór na’in-120 ne’e kompostu hosi feto 60 no mane 60, ne’ebé hala’o servisu rutina hahú hosi segunda to’o sábadu, ne’ebé kada loron sei hetan osan $5 no fulan ida sira bele simu $110 kada ema ida.

Traballadór, Januário Alves, hateten nia parte sente haksolok ho programa hosi PNUD nian ne’e tanba bele ajuda sira iha situasaun pandemia COVID-19 nia laran hodi halo limpeza jerál, no bele hetan osan atu hamoris ninia moris no família.

“Ha’u kontente ho programa UNDP nian, tanba bele apoiu ona aldeia Mota-Ulun hodi bele hetan serbisu. Osan ne’ebé ha’u simu, ha’u sente sufisiente hodi utiliza ba nesesidade loro-loron nian,” nia hateten.

Jornalista : Nelia Fernandes

Editór       : Cancio Ximenes     

HAKEREK NO HATÁN

Please enter your comment!
Please enter your name here