Ministru Turizmu, Komérsiu no Indústria, José Lucas Do Carmo da Silva. Imajen TATOLI/Francisco Sony

DILI, 20 setembru 2021 (TATOLI)Ministériu Turizmu, Komérsiu no Indústria (MTKI) hetan tetu hosi Ministériu Finansa (MF) hamutuk millaun $13iha proposta Orsamentu Jerál Estadu (OJE) 2022.

“Ami prevee millaun $13 iha Orsamentu Jerál Estadu 2022, iha mós orsamentu adisionál maibé seidauk bele adianta tanba sei iha desizaun finál iha Konsellu Ministru molok submete ba Parlamentu Nasionál atu halo diskusaun no aprovasaun,” Ministru Turizmu, Komérsiu no Indústria, José Lucas do Carmo da Silva, hateten, iha Palásiu Governu, segunda ne’e.

Ba tinan oin, MTKI kontinua fó prioridade ba turizmu komunitáriu, komérsiu no indústria, fundu ba kréditu suave ka sosiál ho funan 3% no apoiu fundu ba joventude kreativu.

Notísia relevante: MTKI asina akordu subvensaun ho grupu traballu dezenvolve turizmu komunitáriu

Ba indústria, sei kontinua parke industriál iha Liquiçá, ne’ebé sei prevee pakote hanaran movimentu juventude inkubatór hodi haforsa indústria kiik no média sira.

“Ita sei loke oportunidade ba joventude kreativu ne’ebé hakarak halo negósiu, atu hatama proposta hodi hetan fundu atubele halo negósiu iha área produtivu sira,” nia akresenta.

Setór komérsiu, daudaun ne’e anúnsia konkursu atu públiku sira hatama porposta hodi sai jerente ba programa Loja do Povo.

“Ita hakarak iha tinan 2022 ba oin implementa iha munisípiu hotu hanesan Lautém, Viqueque, no Manatuto tanba daudaun ita anúnsia ona ba públiku atu aplikante sira ne’ebé interesadu sai jerente ba Loja do Povo,” nia hatutan.

Konaba área turizmu, MTKI sei fó prioridade ba reabilitasaun sítiu turíztiku sira hanesan Cristo Rei, reabilitasaun pauzada no uma turizmu sira iha área Metiaut ne’ebé komesa a’at.

Parte Ministériu mós hahú ona prosesu aprovizionamentu ba reabilitasaun uma turizmu iha Cristo Rei ho kustu orsamentu $10.000 to’o $50.000.

Jornalista : Florêncio Miranda Ximenes

Editora      : Julia Chatarina

HAKEREK NO HATÁN

Please enter your comment!
Please enter your name here