Kandidatu funsionáriu hamutuk 83 tuir teste eskrita atu kompete vaga iha Departamentu Rejistu Notariadu, ne'ebé realiza iha CCB, Villa antiga, segunda (20/09). Imajen TATOLI/Natalino Belo

BAUCAU, 20 setembru 2021 (TATOLI)–Xefe Departamentu Rejistu Notariadu munisípiu Baucau,  Justina Mendes da Costa, hateten, kandidatu funsionáriu kontratadu hamutuk na’in-83 hahú teste eskrita ba vaga haat grau G.

“Sira tuir teste iha fatin haat atu haforsa servisu Departamentu Rejistu Notariadu,” Xefe Departamentu hateten iha Sentru Konvensaun Baucau (CCB, sigla portugés),  Villa antiga, segunda ne’e.

Xefe Departamentu Rejistu Notariadu munisípiu Baucau, Justina Mendes da Costa. Imajen TATOLI/Natalino Belo

Ekipa komisaun hahú halo verifikasaun dokumentu teste eskrita, hafoin semana oin, sei kontinua faze entrevista, hafoin iha semana ikus fulan-setembru sei anúnsia konkorrente kualifikadu, nune’e fulan-oin hahú halo serbisu.

Notariadu Baucau presiza funsionariu foun atubele destaka ba postu admistrativu sira iha Baucau hodi hakbesik programa Governu ba povu.

Iha biban hanesan, kandidatu funsionáriu, Francisco de Asis Costa, prontu simu rezultadu teste no bainhira pasa, nia parte komprometidu sei hala’o knaar iha notariadu no serve públiku ho di’ak.

Departamentu Rejistu Notariadu Baucau, daudaun ne’e iha funsionáriu hamutuk sia, kompostu hosi feto tolu no mane neen.

Jornalista  : Natalino Belo

Editora      : Julia Chatarina

HAKEREK NO HATÁN

Please enter your comment!
Please enter your name here