Ministru Administrasaun Estatál, Miguel Pereira de Carvalho Ohin fo Posse Prezidente Autoridade Minisípiu Dili, Guilhermina Filomena Saldanha, iha Minisípiu Dili, segunda (20/09).Imajen TATOLI/Egas Cristovão

DILI, 20 setembru 2020 (TATOLI)-Governu liuhosi Ministériu Administrasaun Estatál (MAE) daudaun ne’e fó ona konfiansa ba Prezidente Autoridade Munisípiu Dili foun atu jere servisu administrasaun lokál no mós tulun Governu hodi implementa planu estratéjiku dezenvolvimentu nasionál (PEDN)  ba 2011-2030.

Ministru Administrasaun Estatál Miguel Pereira de Carvalho hato’o asuntu ne’e bainhira fó pose ba Prezidente Autoridade Munisípiu Dili, Guilhermina Filomena Saldanha iha salaun administrasaun munisípiu Dili, segunda ne’e.

Prezidente Autoridade Minisípiu Dili, Guilhermina Filomena Saldanha,hamutuk ho Prezidente Autoridade Munisípiu sesante (PAM) Dili, Gaspar Soares. iha Minisípiu Dili, segunda (20/09).Imajen TATOLI/Egas Cristovão

Notísia Relevante :Feto dahuluk simu pose sai Prezidente Autoridade Munisípiu Dili

Prezidente Autoridade foun sei ezerse kompetensia ne’ebé governu deskonsentra ona hodi ajuda rezolve problema sira iha área edukasaun saúde, seguransa alimentár, obra públika, transporte, agua saneamentu no ambiente, agrikultura, jestaun merkadu no turizmu, inkluzaun sosiál, jestaun dezastre naturál, rekonsiliu rejisitu notariadu, no mós servisu apoiu organizaun komunitáriu sira.

Governante ne’e rekoñese Munisípiu Dili iha problema kompleksu iha área oi-oin, tanba ne’e presiza jere ho responsabilidade.

Atu rezolve problema sosiál hirak ne’e, Ministru Administrasaun Estatál ne’e sujere ba PAM Dili atu hametin kooperasaun no liña koordenasaun servisu ho parte hotu-hotu nune’e bele hadi’a povu nia moris.

“Iha kontekstu ida ne’e Prezidente Autoridade foun Dili sei iha dezafiu no dimensaun oioin, maibé buka solusaun ba jestaun asidente grave, tratamentu saúde, termolojia dadus, demografía diversidade, inkluzividade problema ambiente abitasaun, edukasaun infraestrutura urbana, orsamentu, seguransa públiku, orden públiku no dezenvolvimentu ekonómia”, Ministru Miguel hateten.

Aleinde ne’e, iha mós problema jestaun rezidu sólidu urbana, jestaun semitériu, dezastre naturál, jestaun merkadu, ordem públiku, tratamentu ba vitima husi asidente grave sira no seluk tan.

“Maske hasoru dezafiu oioin maibé ha’u Laran metin no fiar katak ho matenek no esperénsia ne’ebé Prezidente foun iha no sei konta mós apoiu populasaun inkui komponente sira iha Dili, fiar katak Munisípiu Dili sei  dezenvolve liután iha tinan oin mai,”nia dehan.

Entretantu, Prezidente Autoridade Munisípiu Dili, Guilhermina Filomena Saldanha, hateten ba tinan 2022, nia parte sei submete de’it ba planu no prioridade ne’ebé maka antes ne’e ekipa munisípiu Dili hamutuk ho Komisaun Revizaun Orsamentu Polítiku (KROP) diskute no aprova tiha ona.

“Dili Kapitál nasaun ninian, tanba ne’e atu dezenvolve Dili la’o ba oin la’ós ha’u mesak maibé presiza ita hotu-nia esforsu hodi kontribui ba Dili nia furak”, nia deklara.

Jornalista : Arminda Fonseca

Editór       : Agapito dos Santos

HAKEREK NO HATÁN

Please enter your comment!
Please enter your name here