Diretór SEFOPE RAEOA, Vicente Vaz. Imajen Tatoli/Abílio Elo Nini.

OÉ-CUSSE, 20 setembru 2021 (TATOLI)—Diretór SEFOPE RAEOA, Vicente Vaz, informa Governu liuhosi SEFOPE sei fó apoiu finanseiru ba grupu juventude neen (6) atu kria kampu servisu iha RAEOA.

Vicente Vaz hatutan, foufoun grupu juventude 12 mak submete proposta ba auto-empregu ba SEFOPE maibé liuhosi prosesu verifikasaun no avaliasaun, grupu neen mak prenxe kritéria atu hetan apoiu finanseiru hodi kria rasik kampu servisu.

“Iha tinan ne’e SEFOPE simu proposta auto-empregu hamutuk 12, maibé liuhosi ekipa halo avaliasaun ne’e grupu rua laiha fatin, entaun grupu-10 mak ekipa halo ona avaliasaun ba sira. Rezultadu avaliasaun ne’e, grupu-neen (6) mak liu tanba prenxe kritéria. Grupu lima (5) hosi sub-rejiaun Pante Makasar, grupu-ida hosi sub-rejiaun Oésilo,” Vicente Vaz informa ba Agência Tatoli iha Sikluli, Oé-Cusse, segunda ne’e.

Nia informa, objetivu hosi grupu auto-empregu submete sira-nia proposta atu hetan tulun finanseiru hodi kria servisu rasik liuhosi harii grupu.

Grupu sira-ne’ebé aprovadu iha prosesu avaliasaun mak hanesan grupu Rentál Homes Abiat ho nia tipu atividade mak loke Rentál iha aldeia Sanane, suku Costa, sub-rejiaun Pante Makasar, grupu Nizia Alfaiate ho nia tipu atividade mak Alfaiate hala’o iha bairru Numbei, aldeia Sanane, suku Costa, sub-rejiaun Pante Makasar, grupu Carpintária Pope ho nia tipu atividade mak Carpintária hala’o iha aldeia Nibin, suku Usitaqueno, sub-rejiaun Oé-Silo.

Grupu Fatu-Metan Tono ho nia tipu atividade Oficina hala’o iha aldeia Noe-Ninen, suku Cunha, sub-rejiaun Pante Makasar, grupu Sakrai tipu atividade Soldadura hala’o iha bairru Masin, aldeia Sanane, suku Costa, sub-rejiaun Pante Makasar, no grupu Amnon-Pah ho nia tipu atividade Oficina hala’o iha aldeia Sanane, suku Costa, sub-rejiaun Panta Makasar.

“Ha’u apela nafatin ba juventude sira atu kontinua kompleta dokumentu, tanba programa auto-empregu sei kontinua iha tinan oin,” nia apela.

Kritéria atu submete proposta ba auto-empregu ne’e mak sidadaun Timor-oan, tenke kria grupu mínimu ema na’in-tolu no másimu na’in-lima, esperiénsia negósiu mínimu tinan ida, tenke graduadu hosi sentru formasaun sira iha Timor-Leste ka universidade ka Eskola Tékniku Vokasionál hanesan sentru formasaun Tibár, Becora no Fatumaca.

Nune’e mós tenke iha sertifikadu no diploma ne’ebé rejistu iha Servisu Rejistrasaun no Verifikasaun Emprezariál, Institutu Públiku (SERVE,IP) no proposta ne’e tenke hetan rekoñesimentu hosi autoridade lokál.

Aliende ne’e, membru grupu sira tenke rejista iha sistema Web SEFOPE liuhosi kartaun evidénsia, loke konta bankaria iha banku BNCTL reprezenta grupu la-autoriza individu, no grupu ne’e tenke iha rezidénsia permanente.

Nia informa, tuir lolos grupu-neen sira-ne’e aranka ona ba nasionál atu asina kontratu iha 21 setembru ne’e maibé transporte mak difikulta, nune’e sei adia ba loron seluk.

Fundu atu finansia tipu grupu sira-ne’e bazea ba proposta kada grupu sira, maibé tuir estandarizasaun SEFOPE nian másimal ne’e rihun $8-resin.

Jornalista : Abílio Elo Nini

Editór       : Cancio Ximenes

HAKEREK NO HATÁN

Please enter your comment!
Please enter your name here