Fundasaun Alola fó formasaun kona-bá prevensaun violénsia kontra feto, iha postu administrativu Maliana, munisipiu Bobonaro, segunda (20/09). Imajen Tatoli/Sérgio da Cruz.

BOBONARO, 20 setembru 2021 (TATOLI)—Fundasaun Alola, realiza formasaun kona-bá respeita inan-aman hodi hakb’it komunidade no manorin-sira, atu prevene violénsia kontra feto, iha postu admininistrativu Maliana, Munisípiu Bobonaro, segunda ne’e.

Objetivu hosi formasaun ne’e, atu hasa’e konsiénsia inan-aman ho manorin-sira, oinsa eduka labarik-sira ne’ebé bele hetan tratamentu di’ak iha família, no sira labele hetan diskriminasaun.

Notísia relevante:FOKUPERS Bobonaro rejista kazu violénsia doméstika 24

“Alvu hosi programa spot light mak inan-aman, profesór, estudante no komunidade, maibe seidauk bele realiza iha eskola-sira iha postu administrativu Maliana, tanba MEJD sei suspende hela aula prezensiál,” Reprezentante Fundasaun Alola, Jacinta da Cruz, hateten ba jornalista iha salaun postu administrativu Maliana.

Eskola ne’ebé MEJD identidika númeru violénsia kontra feto aas liu maka Ensinu Báziku Sentrál (EBC sigla portugés) Raifun.

Manuál ne’ebé utiliza iha formasaun ne’e mak hanesan, halo ligasaun ho respeitu, liuhosi fasilita hodi fó hanoin ba inan-aman sira ne’ebé bele sensível ba jéneru, hodi elimina ka redús violénsia kontra feto iha Timor-Leste.

Diretór adjuntu EBC Raifun, Domingos Mendes, konsidera formasaun ne’e bele minimiza kazu violénsia kontra feto iha eskola no mós iha fatin seluk.

Xefe Suku Raifun, Domingos Salvadór, enkoraja komunidade no inan-aman sira atu partisipa iha formasaun ne’e to’o remata, tanba ajuda tebes atu kompriende oinsa kontribui moris armonia iha komunidade nia leet, liuliu haburas liu tan kultura respeita malu ne’ebé avó sira iha.

Programa ne’e realiza tanba hetan apoiu makás hosi UN Woman, Governo liuhosi Sekretariu Estadu Igualdade no Inkluzaun ne’ebé hola parte ba planu asaun anuál violénsia bazeia ba jéneru.

Tuir dadaus ne’ebe Fundasaun Alola rejista iha tinan kotuk, kazu violénsia kontra feto iha territóriu nasionál atinje 65%, kauza hosi fatór ekonomia, seksuál, psikolojia no abandonadu, maibé barak halo hosi família uma laran tanba la hetan rendimentu atu sustenta nesesidade loro-loron.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here