Diretór Jerál DNRN, Crisogno da Costa Neto. Imajen Tatoli/Domingos Piedade

DILI, 20 setembru 2021 (TATOLI)— Ministériu Justisa (MJ), liu hosi Diresaun Jerál Serbisu Rejistu Notariadu (DJSRN), sei dezloka ba nasaun Portugál, Inglaterra, Irlandia no Koreia Súl, hodi fó atendimentu ba Timoroan ne’ebé passaporte inválidu.

Durante iha diápora, ekipa DJSRN mós sei halo emisaun ba sertidaun moris no renovasaun sertidaun moris ne’ebé inválidu.

Notísia relevante:Ekipa téknika resensiamentu eleitorál sei voo ba diaspora

Serbisu notariadu hola parte iha ekipa integradu Ministériu Negósiu Estranjeiru no Kooperasaun (MNEK), Sekretariadu Tékniku Administrasaun Eleitorál (STAE) ho Komisaun Nasionál Eleisaun (CNE, sígla portugés), atu halo resensiamentu eleitorál ba atualizasaun dadus iha diáspora.

“Atu hala’o resensiamentu presiza rekezitu hanesan dokumentu sira, nune’e ita hola parte iha ekipa hodi ba halo emisaun ba dokumentu Timoroan sira,”Diretór Jerál DJSRN, Crisogno da Costa Neto, hateten ba jornalista, iha Dili, segunda ne’e.

Tuir oráriu, ekipa dezloka ona ba diáspora iha 14 setembru, maibé kestaun tékniku balun hanesan orsamentu, no iha hela prosesu ne’ebé sei dezloka iha inísu fulan outubru.

Ekipa tékniku serbisu notariadu iha ema na’in 12 sei koloka ema na’in-tolu kada nasaun ne’ebé tuir planu ekipa integradu sei ba mós iha Austrália, hodi halo resensiamentu, maibé sei suspende hela hodi hein konfirmasaun hosi Embaixada Timor-Leste kona-bá autorizasaun.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here