Komandante Bombeiros RAEOA, Martinho Corbafo da Cunha. Imajen Tatoli/Abílio Elo Nini.

OÉ-CUSSE, 20 setembru 2021 (TATOLI)—Komandante Bombeiros RAEOA, Martinho Corbafo da Cunha, hateten Bombeiros RAEOA presiza tan karreta ba kombate inséndiu tanba karreta Prontu Socorru Lijeira (PSL) no karreta auto tanke mediu inklui karreta auto-komandu nia kondisaun aat.  

“Ami-nia fasilidade hanesan karreta operasaun iha tolu (3) hanesan auto-komandu ida no PSL aat tinan lima (5) ona. Karreta sira-ne’e nia kondisaun aat no seidauk halo manutensaun. Depois servisu bombeiros fó asisténsia to’o sub-rejiaun sira, entaun susar tanba kondisaun fasilidade ladun seguru ona. Ami presiza karreta ba kombate inséndiu iha terrenu,” Martinho Corbafo da Cunha informa ba Agência Tatoli iha Santa Rosa, Oé-Cusse, segunda ne’e.

Obstaklu ne’ebé durante ne’e bombeiros RAEOA enfrenta mak bainhira mosu insendiu ruma, fasilidade urjente atu fó salvasaun hanesan mangeira dada bee-nian kuak kuaze la-funsiona, entaun dalaruma ekipa Bombeiros ba apoiu de’it bee-moos no hetan apoiu másimu hosi komunidade.

Maske fasilidade hirak ne’e kondisaun la permite ona, maibé hanesan makina Estadu funsionamentu intituisaun Bombeiros RAEOA kontinua fó asisténsia ba komunidade atu kombate inséndiu no dezastre naturál ne’ebé akontese iha komunidade nia leet durante iha situasaun pandemia COVID-19 ne’e.

Entretantu, nia informa, kooperasaun ho parseiru servisu hanesan protesaun sivíl ho servisu Solidariedade Sosiál no Inkluzaun iha RAEOA la’o di’ak, tanba sira iha komunikasaun di’ak hosi apoia malu, nune’e bele fó asisténsia ba komunidade ho dignu.

Tanba, tuir nia, bainhira mosu akontesimentu ho emerjensia hanesan ahi han uma, anin sobu uma no dezastre seluk ne’ebé persiza apoiu umanitária imediata, entaun nia espera katak Governu bele tau atensaun mós ba servisu Bombeiros hodi bele aumenta tán fasilidade.

Totál funsionáriu ne’ebé agora daudaun servisu iha Bombeiros Rejiaun Administrativa Espesiál Oé-Cusse Ambeno hamutuk hamutuk na’in-23.

Jornalista : Abílio Elo Nini

Editór      : Cancio Ximenes