Ministru Prezidente Konsellu Ministru, Fidelis Manuel Leite Magalhães. Imajen TATOLI/Francisco Sony

DILI, 20 setembru 2021 (TATOLI)–Governu liuhosi reuniaun Konsellu ministru extraordinária, aprova Projetu Rezolusaun Governu ne’ebé aprezenta hosi Ministru Finansa, Rui Augusto Gomes, kona-ba jestaun no realokasaun veíkulu Estadu ba instituisaun sira.

Tuir Ministru Prezidénsia Konsellu Ministru, Fidelis Manuel Leite Magalhães, inisiativa ne’e ho objetivu atu hamenus despeza ba atribuisaun no promove rasionalizasaun ba parke automóvel públiku.

“Sei fixa númeru limitasaun ba viatura sira ne’ebé aloka ba órgaun no servisu ida-idak no kualkér akizisaun ba veíkulu Estadu nian sei kompensa ho alineasaun ba númeru veíkulu hanesan, no veíkulu Estadu hotu sei rejista iha baze dadus nasionál nian,” Ministru Fidelis informa, hafoin reuniaun ezekutivu, iha Palásiu Governu, segunda ne’e.

Aleinde ne’e, rezolusaun ne’e prosede ba introdusaun medida halo jestaun ba veíkulu Estadu.

“Ho aprovasaun Rezolusaun Governu ne’e, entre medida seluk, sei suspende akizisaun veíkulu Estadu iha tinan 2022 liuhosi despaixu Ministru Finansa,” Portavóz Governu subliña.

Bazeia ba nota ezekutivu, manutensaun karreta Estadu, alugar no kombustível iha tinan 2014 gasta hamutuk millaun $47, tinan 2015 gasta millaun $45, tinan 2016 gasta millaun $28 no tinan 2017 gasta millaun $22.

Daudaun ne’e, viatura Estadu ne’ebé sosa uza Orsamentu Jerál Estadu no balun  hosi apoiu doadór hamutuk 4.197 mak sei ativu, ne’ebé hala’o operasaun serbisu iha 3.693 ka 88% no kategoria a’at hamutuk 504 ka 12%.

Jornalista : Antónia Gusmão

Editora     : Julia Chatarina

HAKEREK NO HATÁN

Please enter your comment!
Please enter your name here