Mapa bloku 18. Imajen/ANPM

DILI, 20 setembru 2021 (TATOLI)–Autoridade Nasionál Petróleu no Minerál (ANPM, sigla portugés) deside ona hodi extende tan tempu ba konkursu no promosaun lisensiamentu ‘segunda ronda’ mina no gás iha bloku 18, to’o iha loron 15 marsu 2022.

“ANPM foti desizaun ne’e relasiona ho pandemia globál, ne’ebé rezulta kompaña barak hapara atividade akizisaun ba rekursu foun sira inklui oportunidade investimentu ba atividade peskiza foun sira ho esforsu atu mantein de’it atividade ne’ebé mak iha ona. Impaktu pandemia globál ne’ebé mós rezulta Timor-Leste lakon oportunidade lubuk ida hodi atinje kampaña globál ba lisensiamentu segunda ronda ba mina no gás iha bloku 18,” refere nota ne’ebé Agência TATOLI asesu, segunda ne’e.

Notísia relevante: Timor-Leste Lansa Konkursu Públiku ba Bloku Foun 18

Iha loron 03 outubro 2019, Primeiru Ministru, Taur Matan Ruak, lansa konkursu publiku ba mina no gás hamutuk bloku 18, kompostu hosi 11 iha tasi laran no hitu iha rai maran.

Tuir planu antes ne’e, lisensiamentu konkursu públiku segunda ronda sei termina iha loron 01 outobru 2021.

Nune’e, ANPM deside hodi mantein atu la’o tuir lala’ok indústria mina no gás nian, hodi extende konkursu, nune’e bele fó oportunidade no tempu ba kompaña mina internasionál no nasionál hodi prepara dokumentu no submisaun ba konkursu ne’e.

Durante tinan 2020 no 2021, ANPM hamosu estratejia foun hodi halo promosaun ba lisensiamentu ne’e hodi organiza konferénsia balun hanesan Simeira Energia Timor Leste ba daruak iha tinan 2020 no Simeira Enerjia Timor-Leste ba datoluk iha tinan 2021 liuhosi virtuál no fórum ida ne’ebé foka ba nasaun Timor Leste.

Notísia relevante: ANPM Halo Promosaun Konkursu Públiku Mina no Gás Iha Bloku 18 Liuhosi Konferénsia Online

Nune’e mós, iha tinan ne’e nia laran, ANPM sei partisipa iha eventu lubuk ida hodi halo promosaun ba lisensiamentu segunda ronda, hanesan NAPE no OTC 2021, ADIPEC 2021 no African Oil Week 2021.

Jornalista : Florêncio Miranda Ximenes

Editora     :  Júlia Chatarina

1 KOMENTÁRIU

HAKEREK NO HATÁN

Please enter your comment!
Please enter your name here