Sekretáriu Estadu Kooperativa (SEKoop), Elizario Ferreira marka prezensa iha Suku Pairara, Postu Administrativu Lospalos, munisípiu Lautém hodi fó pose ba estrutura Kooperativa CU Horupenu, Lospalos, sábadu (18/09/2021). Imajen TATOLI/Antónia Gusmão.

LAUTÉM, 19 setembru 2021 (TATOLI)—Komunidade sira iha Suku Pairara, Postu Administrativu Lospalos, Munisípiu Lautém, sábadu ne’e dekalara ba Sekretária Estadu Kooperativa (SEKoop) hodi harii kooperativa Kréditu Uniaun (CU, sigla portugés) Horupenu iha sira nia suku.

Notísia Relevante: SEKoop enkoraja Kooperativa CU Moris-foun Fuiloro loke klínika

“Ami kontente tebes tanba ami bele harii kooperativa ida iha ami-nia suku. Ho prezensa SEKoop nian ami garante ami-nia kooperativa ne’e sei la’o di’ak maibé ami presiza tulun hosi SEKoop hanesan fó formasaun liu-liu kona-bá kontabilidade nian, nune’e ami bele jere osan hosi membru sira no fasilita sede ba ami atu atividade,” Reprezentante Kooperativa Horupenu, Benedito dos Santos, hateten hafoin hamutuk ho estrutura Kooperativa simu pose hosi Sekretáriu Estadu Kooperativa, Elizario Ferreira, iha suku Pairara.

Benedito garante katak ho estabelesimentu kooperativa Krédito Union ka simpang pinjam bele hadi’a sira-nia moris tanba populasaun Pairara moris iha unidade.

Administradór Postu Administrativu Lospalos, Luis Soares, agradese tebes tanba komunidade Pairara bele iha inisiativa hodi harii ona grupu kooperativa ida iha sira-nia suku laran, atu komunidade bele asesu programa kooperativa Kréditu Uniaun ne’e.

“Kooperativa ne’e ho objetivu, oinsá ita bele halibur ema ho inisiativa rasik, bele halo oinsá ita nia komunidade iha Pairara laran ne’e bele asesu ba ita boot sira-nia programa kooperativa ne’ebé harii ona,” Administradór Postu Lospalos ne’e hateten.

Tuir nia, membru sira hosi kooperativa Horupenu ne’e presiza iha tan formasaun ne’ebé di’ak hodi hasa’e kapasidade iha jestaun hodi bele jere osan rasik iha kooperativa, no garante katak SEKoop sempre iha rekursu ida atu kapasita membru sira iha kooperativa refere.

“Ida mós kona-bá ita-boot sira-nia fatin. Ha’u hanoin, fatin ba ita-boot sira labele preokupa tanba rai iha ona. Maibe, oinsá mak ita-boot sira bele kria konstrusaun ida, atu sai grupu ninia edifísiu ida para ita-boot sira bele servisu iha laran no bele jere ita-boot sira nia atividade ida-ne’e la’o ba oin,” nia dehan.

Sekretáriu Estadu Kooperativa (SEKoop), Elizário Ferreira, husu ba membru sira atu fiar malu, tanba osan bele sai bani-been no bele mós sai veneno.

“Kona-ba formasaun, lalika preokupa tanba ne’e programa SEKoop nian. Imi seidauk hetan formasaun, imi foin hetan diseminasaun no formasaun bázika. Imi sei hetan formasaun kontabilidade, maibé hau fó parabéns, tanba ha’u haree joven sira lubuk ida iha estrutura nia laran no sira ne’e mak sei iha oportunidade atu ruir tan formasaun,” governante ne’e afirma.

Liuhosi formasaun kontabilidade, membru sira bele halo jestaun ida di’ak, atu asegura estabilidade institusionál, finanseira, no ekonómiku kooperativa nian hodi asegura bein estar membru sira-nian.

Kona-ba rai atu hari’i fatin ka sede, nia dehan, la’ós Estadu laiha osan maibé iha kooperativa nia baze mai hosi membru sira.

“Tanba ida ne’e, imi na’in 80, ema ida lori tan ema ida iha fulan ida, signifika, fulan setembru ne’e imi iha 80, fulan outubru imi iha 160, iha novembru mai imi iha 320. To’o dezembru, imi iha na’in 740, janeiru imi hetan 7.500. Kuandu to’o ona númeru ne’e, SEKoop halo imi-nia uma ida,” nia promete.

Kooperativa Horupenu hari’i loron 21 fulan-agostu 2021, ho totál membru hamutuk na’in-80 no halibur ona osan hamutuk $13.442.

Jornalista : Antónia Gusmão

Editór       : Cancio Ximenes

HAKEREK NO HATÁN

Please enter your comment!
Please enter your name here