Prosesu konstrusaun UKL, iha aldeia Moleanan, suku Ritabou, postu administrativu Maliana, munisípiu Bobonaro, sábadu (18/09). Imajen Tatoli/Sérgio da Cruz.

BOBONARO, 18 setembru 2021 (TATOLI)—Progresu konstrusaun Uma Kbiit La’ek (UKL), iha aldeia Moleanan, suku Ritabou, postu administrativu Maliana, munisípiu Bobonaro atinje ona 25%.

“Tékniku Programa Dezenvolvimentu Nasionál Suku (PDNS) relata mai ha’u katak, sira halo estudu ba konstrusaun uma tolu ne’ebé  agora konstrui iha suku ne’e, atinje ona 25%,” Xefe suku Ritabou, Maximiano dos Santos Aroújo, informa ba jornalista iha rezidénsia, sábadu ne’e.

Notísia relevante:Konstrusaun UKL iha Madebenu atinje 50%

Prosesu konstrusaun ba uma tolu ne’e, to’o ona hada batako, posiblidade semana oin finaliza no kontinua fali kesi besi koluna nian, tanba kompañia halo distribuisaun materiál la atrazu.

Implementasaun programa ne’e, transparante tebes, tanba ekipa fiskalizadór inbolve hotu órgaun independente-sira, inklui autoridade lokál sira.

Líder komunitaria ne’e konsidera programa ne’e benefisia direta ba komunidade no kontribui makás ba rekoperasaun ekonomia, tanba durante pandemia COVID-19, komunidade barak mak laiha rendimentu hodi responde ba nesesidade uma laran, sa tan atu konstrui uma ho nia kustu ne’ebé boot.

Tuir kontratu, projetu ne’e ninia atinjimentu ho durasaun fulan tolu, nune’e Xefe suku kontinua serbisu hamutuk diak tebes ho tékniku PNDS, nune’e kompañia labele distribui materiál atrazu.

Bada’en, Júlio Afonso promete sei responsabliza hodi selera konstrusaun ba obra ne’e tuir dezeñu to’o finaliza ho kualidade.

Benifisiéria, Lúcia Perreira agradese ba Governu liu-liu ba implementadór UKL liuhosi PNDS, tanba bele tulun ona sira hari uma ne’ebé dignu.

Lúcia promete bainhira obra ne’e konklui no Governu entrega, sei kuidadu ho di’ak to’o tempu naruk tanba uma hanesan rekordasaun hosi Governu no sai hanesan istória permanete ida ne’ebé sei konta tutan ba jerasaun tuir-mai.

Benefisiáriu iha suku Ritabou mak hanesan Olandina Abu Bere, Miguel Lelo Mau no Esperança Sose Mali.

Totál orsamentu ne’ebé Governu liuhosi PNDS prevee ba konta bankária suku Ritabou hamutuk $54.108, hosi númeru ne’e, finansia ba atividade fíziku $51.000 operasionál $3.000 no ko’a ba BNCTL $108.

Jornslista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here