COVALIMA, 18 setembru 2021 (TATOLI)—FALINTIL Forsa Defeza Timor-Leste (F-FDTL), ne’ebé destakadu iha suku Lalawa, postu administrativu Tilomar, munisípiu Covalima, asesu ona bee-moos.
Forsa armada sira asesu bee moos mai hosi bee matan iha suku Lalawa ne’ebé konstrui hosi kompañia Winstone konstraction iha 2014 no foin hetan manutensaun iha tinan ne’e hosi ekipa ezersísiu harii hamutuk.
Notísia relevante:Abríl-juñu, Floresta Covalima kontribui reseita $8,200
Ohin mós komunidade hamutuk ho lia-na’in hosi uma lisan Baubein Beikoli hosi suku ne’e realiza serimónia kulturál, hanesan mós serimónia inaugurasaun ba bee ne’ebé foin konsege kanaliza to’o hela fatin forsa armada sira nian.
“Ohin ami realiza serimónia kulturál ida hanesan serimónia agradesimentu, tanba iha bee ho volume natón, bele kanaliza to’o postu forsa armada sira hodi bele konsumu, tanba tempu barak liu seidauk asesu bee-moos,” Xefi suku Lalawa, Remígio Gomes, hateten ba jornalista sábadu ne’e.
Iha serimónia agradesimentu ne’e, lia na’in-sira oho fahi no manu, hamulak tuir lisan Baubein Beikoli hodi bele hetan nafatin matak malirin no bele hetan mós isin diak ho bee moos ne’ebé iha ona, tanba ida ne’e konsidera hanesan grasa Maromak-Nian.
Jornalista: Celestina Teles
Editór: Cipriano Colo