Universidade Nasionál Timor Lorosa’e (UNTL), hala’o graduasaun ba estudante finalista-sira iha Sentru Konvensaun Dili. Imajen Tatoli/Dok

DILI, 17 setembru 2021 (TATOLI) – Vise-Reitór Asuntu Akadémiku no Garante kualidade, Samuel Venâncio de Sousa Freitas, konsidera seidauk iha dadus estudante hira mak asesu ona pulsa gratuita hosi Governu.

UNTL rasik mós iha ona mekanizmu atu kontrola estudante na’in hira mak asesu ona pulsa gratuita maka sei liu hosi rejistu online.

“Ami seidauk iha dadus estudante na’in-hira mak hetan ona pulsa tanba lista naran ho númeru ne’ebé ita fó ne’e operadór sira haruka direita pulsa ba estudante sira, ne’ebé ita laiha dadus,” Samuel Venâncio de Sousa Freitas informa fatin kampus UNTL, Caicoli, sesta ne’e.

Universidade iha polítika ida atu konfirma estudante sira hetan duni pulsa ka lae sei liu hosi rejista online, bainhira estudante sira mai foti KRS tenke konfirma sira nia naran iha lista estudante nia. Kuandu sira hetan injesaun propinas konserteza sira mós simu pulsa.

“Ita utiliza maneira ida ne’e atu prepara dadus ruma bainhira ekipa monitorizasaun hosi ministériu hakarak avalia karik ita bele aprezenta mós dadus ba sira,” tenik nia.

Samuel informa katak durante ne’e universidade la hatene estudante ho persentajen hira ona mak simu pulsa hosi Governu tanba laiha dadus. Universidade la hatene atu husu ba se, tan ne’e universidade atu verifika didi’ak lista sira-ne’e molok hetan ministériu halo fiskalizasaun.

Ministru Ensinu Superiór Siénsia no Kultura (MESSK) Longuinhos dos Santos akresenta katak subsídiu pulsa ne’ebé governu fó ba estudante sira durante fulan tolu kada fulan $10,00 ne’e sei termina iha outubru, tinan ne’e.

“Pulsa internet hanesan ha’u informa ona ba ita-boot sira katak iha outubru sei finaliza ninia prosesu enkarregamentu kada estudante sei hetan $10,00 ne’ebé fulan tolu  sei hetan $30,00,” nia hateten.

Jornalista : Tomé Amado

Editór       : Francisco Simões

HAKEREK NO HATÁN

Please enter your comment!
Please enter your name here