Imajen/Espesiál.

DILI, 17 setembru 2021 (TATOLI)—Ekipa Sala Leitura Xanana Gusmão (SLXG), tuir planu segunda (20/09) ne’e sei fó formasaun konabá sistema dijitál “KOHA” ba ekipa jestaun sentru biblioteka Komunidade Salesiano Venilale, munisípiu Baucau.

Formadora Sala Leitura, Xanana Gusmão (SLXG), Maria Amaral Guterres, hateten atividade formasaun ne’e, hanesan mós formasaun ne’ebé SLXG hala’o ona iha munisípiu Covalima, ne’ebé konabá treinamentu no halo instalasaun ba sistema biblioteka “KOHA”.

Notísia Relevante: SLXG fó formasaun sistema dijitál “KOHA” ba ekipa jestaun biblioteka Covalima

“Aminia formasaun ne’e, atu fornese formasaun ba funsionáriu biblioteka sira no halo instalasaun sistema biblioteka dijitál ne’ebé mak hanaran KOHA, nune’e bele ajuda funsionáriu sira hodi jere sirania biblioteka rasik ho sistemátiku,” Maria Amaral Guterres hateten ba Agência Tatoli, via telefónika, sesta ne’e.

Formasaun ne’e importante tanba sei fahe esperiénsia ba funsionáriu biblioteka iha fatin refere, atu bele iha koñesimentu konabá instalasaun sistema biblioteka KOHA liuhosi matéria kona-bá klasifikasaun ba livru sira no oinsá halo katalogasaun.

“Matéria ne’ebé ami fó iha formasaun ne’e, ami sei hanorin sira oinsá halo klasifikasaun ba livru bazea ba livru nia asuntu, hatama dadus ba sistema KOHA, oinsa halo katalogasaun no kria materiál biblioteka sira hanesan kartaun membru no barkot sira,” nia esplika.

Nune’e mós, iha formasaun ne’e sei inklui mós sistema Online Public Access Catalogue (OPAC) ne’ebé mak ninia funsaun atu tulun kliente sira asesu ba livru ne’ebé mak halo ona nia katalogu.

Entretantu, formasaun konabá sistema dijitál “KOHA” sei fó ba ekipa jestaun sentru biblioteka, komunidade Salesianu Don Bosco Venilale na’in rua (2) ho nia durasaun loron lima, hahú hosi 20 to’o 24 setembru 2021.

Jornalista : Nelia Fernandes

Editór       : Cancio Ximenes

HAKEREK NO HATÁN

Please enter your comment!
Please enter your name here