Diretór Serbisu Edukasaun munisipál Bobonaro, Crispin Moniz. Imajen Tatoli/Sérgio da Cruz.

BOBONARO, 17 setembru 2021 (TATOLI)—Ministériu Edukasaun Joventude no Desportu (MEJD), seidauk hatún despaixu foun atu reativa aula prezensiál, iha postu administrativu Maliana no Cailaco, munisípiu Bobonaro.

“Tuir loloos aula prezensiál iha postu admistrativu rua ne’e hahú horisehik, maibé to’o agora ami seidauk hetan despaixu fou. Tanba ne’e, ami mantein desizaun anteriór,” Diretór Serbisu Edukasaun munisipál Bobonaro, Crispin Moniz, informa ba jornalista iha kna’ar fatin, sesta ne’e.

Notísia relevante:MEJD kontinua suspende aula prezensiál iha Maliana-Cailaco

Crispin Moniz hatutan, dalaruma parte MEJD seidauk bele hatun despaixu hodi reativa tanba iha suspensaun aula prezensiál iha 02 setembru, totál kazu pozitivu COVID-19 hamutuk 64,maib’e ohin Diretór Serbisu Saúde Bobonaro konfirma katak, agora kazu aumenta ba 94.

Ho situasaun ne’e maka, Crispin Moniz orienta ona Diretór eskola-sira atu halibur dadus no kartaun vasinasaun hosi profesór sira, tanba ho baze ne’e mak MEJD iha konfiansa atu reativa aula prezensiál.

Husi parte saúde mós preparadu, tanba fasilidade saúde ne’ebé antes ne’e instaladu iha eskola-sira sei kontinua funsiona no foin lalais UNICEF apoia tan máskara hodi distribui ba estudante nível ensinu báziku hamutuk 25.611 ba pré-eskolár 2.600-resin no estudante ESG ho ETV mak seidauk hetan.

Iha 02 setembru, MEJD hatún despaixu númeru 46/GMEJD/IX/2021, hodi suspende provizóriu aula prezensiál iha postu adminiatrativu Maliana no Cailaco durante semana rua, maibe la abranje to’o postu administrativu, Balibo, Bobonaro no Loloto’e.

Jornalista: Sérgio da Cruz

Editór: Cipriano Colo

HAKEREK NO HATÁN

Please enter your comment!
Please enter your name here